Ka KSU East Jaiñtia Hills District Unit da wai wei da e kti ko ya i kynroh wa da yarap chna da ka seiñ ha 7 Thyndai Child Care Institute Cum Counselling Center, Tuber Kmai Chnong ha ka 20 tarik uni u bnai ha ka yalang wa da emlang u President waheh dooh ka KSU u Lambok S Marngar.
Ha kani ka sngi da em ka yalang wa pynlai da u Kwillness Suchiang, General Secretary ka KSU EJHDU, heiwa ka F. Ryngkhlem, Secretary ka Seinraij Tuber Women’s Wing da khana ko ya ka parom yong ka 7 Thyndai Child Care Institute Cum Counselling Center.
Da ong ko wa da jooh pynman ya ki Fete, ki lehke Drama, Miss Tuber wow yoh u chna ya kani ka thaw ri khynnah wei nadooh u snem 2017 da sdang pdiang noh ya ki khynnah cha kani ka thaw.
U Streamly N Suchen, President ka KSU EJHDU da e u yei klam wa tbian heiwa da ong u wa emkaam wow yarap kylliang iwi ya iwi khamtam ya ki khon khonswet.
Da yoh leh i klam na u President ka Seiñ Raij Tuber, u H. Phawa uwa da sñiawngooh wei e khublei u ya ka KSU kawa em yei kitkhlieh yei chongsuk ha Bri u Ynñiawtrep.
U Lambok S Marngar da yaroh u ya ki manbei wa pait ya ka 7 Thyndai Child Care Institute Cum Counselling Center hapyrdi i eh i khor khamtam wow ri ya ki khynnah wa da dooh noh ya ka bei wa u pa.
Da sñiawkmen u leh ya ka Seiñ Raij Tuber kawa kdup wei yah luti ya kini ki khynnah wei da kyrmen u wa kani ka thaw daw lai ko chaphrang wow leh ya ki kaam wa bha.
