Ka seiñ JNC Western Zone hapoh i yahkhmat u President yong ka, u Hamehi Bamon hadien ar bnai wa dadep booh ujor ha yung krehkaam yong ka JIO kawa em ha Jowai neidaw wa joor wa thut ka Network ha ki thaaiñ Mukhap, Mowkaiaw kamjooh ha kiwi tawon ki chnong kiwa dang toh u yoh Network na u Tower wa em ha kani ka thaaiñ. Ka seiñ da chem ko wa hadien wa da ujor neiliang ka JIO da pynchna tangdep ko khlem da biang ki tiar ki tar hadooh wa ka Network dang joor chooh chooh i thut ko.
Kamtæ neiliang ka seiñ deiwa joor i chrai, ynnin da ka sngi heipor kamwa 4:00 waje i janmiet da lai hiar lai pait biang ko ya uni u Tower wa em ha thaaiñ Mukhap-Mowkaiaw heiwa da rai wow khang tala noh oo chisiendon neidaw wa thut ka Network da boon tylli ki bnai.
Neiliang ka yung krehkaam ka JIO mar ya tip ki wa ka da mut ka seiñ wow khang ya uni Tower, da kyrpaad ko ya ka seiñ wow e por wow pynpoi smat noh ya ki tiar ki tar wei yow kreh wut-wut khnang wow biang ka Network kam nachwa.
Neiliang u President ka seiñ da maham u leh wa lada cha kiwi tawon ki chnong kiwa dang haap hapoh yong ka West Jaiñtia Hills waroh lada wym biang i krehkaam ka JIO næ ka Airtel, daw leh i jooh wow khang tala chisiendon, neibhah toh i kaamram yong kiwa kreh wow tip ki yeini wei wow pynbiang ya ki tiar ki tar kiwa sih næ wow pynchna wut-wut yeiwa sih yow lait u chah ktah ki paidbah ha kani ka juk wa katni wa emkaam ya ka Mobile wa Internet.
Da ong leh wa hawa ki paidbah biang su ki, ka Network leh toh u biang ko ymtoh wow pynlutsan donhi ya ki paidbah wei kani toh ka maham wa khaddooh ya kini ki Company wa lada ym ye ki wow leh yei kaamram ki dang bha wow khang lut ki waroh.
Discussion about this post