Kiwa sikai skur Adhoc hapoh ka lama ka Federation of All School Teachers of Meghalaya (FASTOM) da pteiñ ki yei yakhih yong ki deiwa pynman ya ka chong kyllaiñmynngor ha Amlarem kawa da sdang ynne ka sngi wei daw pteiñ hadooh ka 29 tarik uni u bnai.
Kani man ko leh kam chibynta ka Non-Cooperation Movement pyrchah ya ka sorkar ka wym bna yei dawa kiwa sikai heiwa ynne ka sngi ya kani ka yakhih da pynman da ka chnat Amlarem ka FASTOM heiwa ki dkhot da ong ki wa ka sorkar ong ko wa kiwa sikai toh ki bood-loom ka imlang sahlang tangwa ym em pynoo ko dei kaam yeini.
Da ong ki leh wa ki kam kiwa sikai toh kiwa da leh bait katwa phah ka sorkar, kamtæ ym toh wow leh chiliang ya kiwa sikai Adhoc wei da toh por wow pynku ya ka tulop wa ryngkat wa i kreh wa leh ki neibhah ki leh kreh ki kamwa kreh kiwi kiwa sikai.
Chooh chooh da ong wa kani toh ka laad wa khaddooh ya ka sorkar wow leh ko yeiwa emkaam yow e laad ya kiwa sikai u im ki dei burom neibhah ki ym toh kiwa khrong, ki toh kiwa tei ya ri wei kammon ka sorkar kam ko wa kreh ko neibynta ya ka jaitbru tangwa ka kiwa sikai ym ye ki wow leh iyi iyi leh.
Da ong ki wa katwon hap pyndooh burom ya kiwa sikai wa hap wow chong sa sarok kamni hanla kattæ leh man ki kiwa yatylli waroh wei ym emkaam ka sorkar wow paan ya ka Report yow tip hadooh ngut kiwa da chimbynta ha kani ka yakhih neibhah da wan nadooh kiwa sika LP hadooh Higher Secondary.
Da jubab ki eh yeiwa ong u Montri ka chnat Puræ Puthi wa ya kiwa sikai Adhoc da thung da ki SMC heiwa da pynche ki cha u Montri wa kiwa sikai Deficit leh i jooh i rukom thung ya ki tangwa ka tulop wa yoh ki man ko kawa heh wa biang tangwa ya kiwa sikai Adhoc won da leh chiliang hanla ya ki da thung katkam ki kyndon wa da booh.
Kiwa sikai da dawa ki wow pynku ya ka tulop ki da T. 18,000 wa 5% i pynku (Increment) man-u-snem wei wow pynku kyrdan ya ki kam kiwa sikai Defict.
