U Wanbun N Dkhar uwa man kam u General Secretary ka Hynniewtrep Integrated Territorial Organisation-Central Body nadooh u snem 2021, da chim u yei rai wow chong-ngiah noh na ka seiñ na ki daw yong samen.
U Wanbun toh uwa da em ha ki kaam kreh monsñiawbha nadooh u snem 2008 hadooh kini ki sngi wa katni, wei da ong u wa da toh i por wow chong-ngiah noh wei wow pyrkhat deiwi ya ki laad ki luti i chakri paidbah.
Da e khublei u leh ya ki para wa yahkhmat ka CEC wa ki dkhot kiwa e yei kyrchaan wei e mynsien hei lai luti u kam u General Secretary ka seiñ nadooh wa sdang hadooh kattæ wei kamjooh leh ya waroh ki paradoh parasnaam ka bri u Ynñiawtrep kiwa jooh e mynsien hei chakri paidbah.
Chooh chooh da ong u wa i chakri paidbah ym mut du wow kreh monsñiawbha tangwa hawa ong chakri mut wa em ki rynsan wow e yei chakri.
“Kam uwa yahkhmat uwa da rangbah, smat O wow yarap ya ki paidbah ha kawon kawon ka bynta wa ki kaam katkam wa chah i bor, neibhah ngait O hawa ong chakri jaitbru toh ka chakri ya u Blai wei kawa kongsan toh u kynmoo i wa toh u em i mynsien sñiawngooh wei kawa burom markylliang wei wow yaichah khnang yow ye u jop hawa im i,” pynkut u Wanbun.
Discussion about this post