Jowai : Ka scheme Meghalaya Rural Public Transport Service kawa man ka scheme sorkar ka wow yarap pynyoh kari lai yaaw lai hat ya ki paidbah wa sah cha palat chnong hei dor wa duna, ha u snem 2015 ha u Naikhynde da pyllait 5 tylli ki kari TATA Winger ha Jowai neibynta ka West Jaiñtia Hills District.
Kini ki 5 tylli ki kari toh u kamai ki na Dawki-Muktapur cha Jowai, Padu cha Jowai, Khanduli cha Jowai, Saphai- Garampani cha Jowai wa na Umsalait-Sahsniang cha Jowai.
Na kini ki 5 tylli kawa toh u kamai Saphai-Garampani da neh ko ha pchem ka ophis u DTO, Jowai nadooh wa sdang neidaw wa ka SHG wa tip kam ka Ialong Transport Society ym bien ko u chimkti ya kani ka kari neidaw wym tip.
Hei yaklam wa u Wyrta neiliang u DTO u P. Laloo da pyntip u wa lada em kiwon kiwon ki SHG, ki NGO, ki Society wa ki bru samen (Entrepreneur) wa kwah u kamai ya kani ka kari ye ki u lai yachem wa oo.
Ki kyndon man ki kamni næ; ki seiñ toh u man ki kiwa da dep register hapoh ka Registration of Societies Act, haap booh poisa (Bank Guarantee) wa T. 1 lak ha ki bank wei ya ka luti wow kamai toh u lai ki katkam wa da booh da ka sorkar.
Neiliang ka office u DTO daw yarap ko u pynyoh ya ka Permit wa kiwi ki kot kari wa emkaam wei kiwa pyllai ya ka toh u sumaar ki ya ka wei ki wa toh u bahkhlieh yei lut nadong chadong.
Kani ka scheme toh kawa da lai bait bha cha kiwi ki thaw heiwa da yoh myntoi ym du ki paidbah kamjooh leh ya kiwa pyllai ya kini ki kari.
Discussion about this post