Ka Loompyrdi Iongpiah kam kawi na ki dong ki chnat wa dang bood dang ksoh ya ka rukom dustur wa sikai ki manchwa longchwa, ha uni u snem nadooh ka Musiang 23 tarik waka Sngi Muchai 24 tarik u Naisan da pynman ko ya i lehke Drama kam chibynta ka Bamphalar ha Yungwalieh da ki ar tylli ki parom wa pyrtuid ‘Nongkylliang’ wa da thoh da u Treborlang Laloo wa ka ‘Kit Krah’ wa da thoh wei pyntoh pyntne da u C. Pynsakhiatieini Kyndiah.
Ha ki ar miet yong kani ka lehke drama chwa wow yoh ki paidbah u yoo ya ki sarin yong ki parom drama, da kdaar yahkhmat chwa da ka yalang wa tbian heiwa ki waheh wasian ka Loompyrdi Iongpiah wa kynthup yow Bimee L. Suwer, Waheh Chnong, u Sienlangki Myrten, General Secretary, u Tympang Laloo, Symbood Waheh Chnong wa u Ewotki Challam, Secretary Art & Culture da e ki i klam i kappæ chaphang ki yurim yong ka Bamphalar deiwa kyrsu kyntu leh ya ki khon khynroo khyllood wow man kiwa kitkhia u pynim pynneh pynsah ya kani ka rukom dustur kawa pynyoo yei man kyrpang ka jaitbru hakhmat ka pyrthai.
U Bimme L. Suwer da ong u kani toh ka rukom dustur wa da pynjooh sikai na warim kawa jooh leh næ pyndep chisien chisnem chwa wow pynhiar pynhap yow symbe u phniang cha hali pynthor.
Chooh chooh ong u leh ka Bamphalar man ko ka por wow yachemlang ki khon u loom u pdeiñ ha Yungwalieh dei kmen i ka-it mynsien neitæ man ko leh chibynta ka tyngkong wow yoh laad ki khon ka dong ka chnat u loom u pdeiñ u ya pynyoo pyntaw sap nadooh kiwa em sap hei thoh drama, thoh sur næ u ya chimbynta ha i lehke drama, chutia danda.
Ya ka Bamphalar yong ka Loompyrdi Iongpiah da pynkut ha ka sngi Pyngkat 25 tarik dei wa em i ya baamdoh sñiawbha ha Yungwalieh iwa da chimbyntalang da waroh ki khon u loom u pdeiñ ha ka yurim wow wanrah ya itæ i sñiaw yaman iwi wei yatylli.
Discussion about this post