Ynne ka Mulong ka 1 tarik kawa man ka sngi wa ar yong ka lehniam Behdieñkhlam ka Raij Jowai, dang step da pyndep ya ka Kñia Aitnar hapoh i pait i yoo u Dolloi, u Pator, u Langdoh, u Sangot, ki wasan waheh wa ki kñi na ki kur waphær waphær heiwa ka kñia da man ko kawa miat wa bha.
Ynnin hadien wa ki Khonraij da pyndep ki yei rong i rah ya ka Symbood Khnong na khloo na kjam cha kjat u Loom Sooyung, ynne won ki Kmairaij da lai thooh ki ya ki Dieñkhlam na khloo wow wanrah chapoh ka Raij katwa ki Khonraij won lithooh ki ya ka Khnong Blai.
Hadien won da wanrah ya ki Dieñkhlam cha Iawmusiang da jar jiar ki chnong wa kynthup ya ka Tpep-Pale, Dulong, Panaliar, Loomiongkjam, Iongpiah wa Loomkyrwiang.
Neitæ won ka Khonraij da lai thooh ki ya ka Khnong Blai kawa da pynchong chipor ha Poh Sawiar (hajan ka yung krehkaam u DC, Jowai) wei da rah ya ka cha Loom Sooyung (Hajan Marian Hills HSS) manda poi lut ki Dieñkhlam ha Iawmusiang.
Ynne ka sngi ki khynnah chynrang wa khynnah kynthai deilang wa ki waheh da chaad ka’it ki dei mynsien wa kmen hei kieh ki bom, ki bikur, ki chæng chæng wa ka bhuri.
Discussion about this post