Ynne ka sngi kawa man ka sngi wa 5 yong ka Dorbar Mang Tanka da man ko kawa chongchit bha hadien wa u MLA ka North Shillong, u Adelbert Nongrum da pynyoo u yei chrai ya ka Sorkar kawa da ong wa dang bichaar ko heiyatoh wa i pynyinsur ya i rta thap kreh ki khynroo khyllood ha ki chnat sorkar.
Ynne ka sngi neiliang u MLA ka UDP na Mowkaiaw, u Nujorki Sungoh da kylli u wa lada ka sorkar da chimkhia ko ya i tyrwa ka UDP wow pynyinsur ya i rta thap kreh heiwa neiliang u Montri Rangbah, u Conrad K Sangma da pyntip u wa ka sorkar dang bichaar bniah ko ya ini i kaam.
Neiliang u Montri Rangbah da pynsñiaw u wa ini toh i kaam wa emkaam wei neiliang ka sorkar dang pyrchang ko wow leh iwon iwon, tangwa em leh ki bynta wa yoh wei dooh myntoi, heiwa da pyntip u wa i pynyinsur ya i rta neibynta ki Nurse cha ka 27 snem wow thap kreh wei neibynta ki Schedule Tribe da pynyinsur sa 10 snem.
Katkam wa ong u Conrad, i rta thap kreh ha ka jylla hadooh katni man ha ki chnat sorkar man i hapoh 27 snem, ki Doctor hapoh 41 snem, Professor 32 snem, ha ki kaam pulit neibynta ki Sub Inspector hapoh 27 snem katwa ki Constable hapoh 21 snem.
Heijooh i por da ong u wa da em i pynkylla ha ki kattu katni ki Selection Board, tangwa i rta wa kheiñ lang wow thap kreh hapoh ka jylla man i 27 snem.
Hawa chimbynta ha ini, u Adelbert da pynyoo u yei chrai deiwa kylli iyi mut ka sorkar wa dang bichaar ko yeini heiwa ki khynroo da sepai i por ki hawa thooh kreh wei toh u pyrkhat yaka jaitbru wei waroh hap u chimkhia ya ini i kaam.
Ha ini i por neiliang u Conrad da pynsñiaw u yei wym sñiawsuk ya i rukom kylli u MLA deiwa ong wa u MLA ymye u wow wan leh drama hapoh yung dorbar neibhah waroh em ki hapoh dorbar deiwa chimkhia ym toh du Adelbert wa chimkhia.
Ha ini i por neiliang u Symbood Montri Rangbah da ong u wa u MLA chwa wow kylli emkaam wow booh u yei sñiaw harood.
