Da ki hajar ngut ki paidbah da wan tooid ki wow sakhi ya ka tamasa 100 Drums Wangala Festival ha Chotipara, Goalpara District ka jylla Assam kawa da poi cha wakut ynne i janmiet deiwa tem ya ki bom ki ksiñ Garo wei da man ko kawa chongchit.
Ya kani ka tamasa da pynman da ka Garo Cultural Forum waka Garo Students’ Union (GSU), wei man ko ka sien wa ar wow pynman ya kani ka tamasa hadien wa dep u ah ya u kba da ki jaitbru Garo wa em ha Assam.
Da em 10 tylli ki dhab kiwa chaad Wangala kiwa chimbynta ha ki ar sngi iwa da riñ ki ya ki paidbah kiwa da wan na Bongaigaon wa Boko najan Guwahati yow wan pait ke.
Kiwa jop ha ka 100 Drums Wangala Festivals kawa dang dep pynman ha Garo Hills da wan ki wow pynwyrngia ya ki paidbah da i rukom chaad wa phær yong ki wei da emlang leh kiwa chaad Wangala kiwa napoh Assam kiwa na Kamrup wa Goalpara District.
Ha kani ka sngi da emlang u Montri i puræ puthi ka Meghalaya, u Rakkam A Sangma kam u kongsan uwa da ong wa ha kini ki snem wa da lai da pynchlur ya ki Garo lada em ki ha iwon iwon leh wow ksoh ki yaka dustur riti wei da kmen u wow yoh u yoo yeini.
Da ong u leh wa nachwa i lehkmen kam ini da pynman du ha ki kattu katni ki thaw wei katni da sdang wow pynyoo yei angnood wow pynneh pynsah yaka dustur riti wei kamjooh leh wow pynyoo pyrthai ya ka.
U Rakkam da chibynta u leh ha kani ka chaad Wangala ha kani ka sngi pynkut.
Kiwi kiwa em ha kani ka sngi toh u Pongseng R Marak, u MLA ka Bajengdoba, u Chairperson ka Public Grievance & Redressal Committee, u Ramakant Rabha, u Deputy Chief Executive Member ka Rabha Hasong Autonomous Council, u Frylin R Marak wa kiwi kiwi.
Discussion about this post