Ka Bamphalar toh kawi na ki rukom dustur wa da leh da pyndep ha chnong Jowai da ki kattu katni tylli ki dong ki chnat chwa wow sdang i rep i riang cha hali pynthor.
Kamtæ ha uni u snem ka Loomkyrwiang Dorbar Chnong hei pait i pynlai ka Bamphalar Committee daman ko kawi na ki dong ki chnat wa pyndep nyngkong yaka Bamphalar yong uni u snem 2024 dei wa pynman yaka lehke Drama ha Yungwalieh ha ka sngi Khyllaw 26 tarik katwa ha ka sngi wa bood won ka Pynsin 27 tarik da em i ya baamdoh sñiawbha ha Yungwalieh da waroh ki khon ka dong ka chnat, u loom u pdeiñ iwa man katkam ka rukom-dustur wa da pynjooh sikai na warim.
Haka yalang yahkhmat yong ka miet lehke Drama wa da pynlai da u Daioolang Pakma, Symbood Waheh Chnong da em i ngoohblai ngoohsyiem da u S.D. Laloo, General Secretary neitæ i klam kyrpang chaphang ka Bamphalar da u Lammat-Oo Laloo, Waheh Chnong katwa u Arkiru Laloo, Secretary Bamphalar Committee hei pynkut da e u ki kyntien sñiawngooh.
U Lammat-Oo Laloo hawa klam chaphang ka Bamphalar da ñiawtang u wow kynmoo yei naam i pyrtuid ki waheh wasian, manbei manpa ka Loomkyrwiang kiwa em i sap i ka-it hei thoh yaki parom waki sur lehke Drama wei da khana u leh wa ka Loomkyrwiang daman ko kawi na ki dong ki chnat wa bna naam yong kitu ki por wei i sap lehke Drama yong ki waheh wasian ka dong da poor i leh cha kiwi ki chnong ki thaw kam cha Nongkrem, Moolamanoh wa kiwi kiwi.
Chooh chooh da khana u leh wa dang nachwa heipor lehke Drama yei bynta yong ki kynthai næ Actress leh da hap bait u pynriam da ki chynrang, iwa sñiawsuk ong u Lammat-Oo Laloo wa ka dong Loomkyrwiang toh ka dong kawa nyngkong dooh wow pynmih Actress da ka kynthai wei nadooh kitæ ki por kiwi ki dong leh da sdang ki u bood u pynchlur yaki kynthai wow embynta haka lehke Drama heipor Bamphalar.
Neiliang u Lammat-Oo Laloo, da kyrsu kyntu u leh ya ki khon khynroo khyllood wow man kiwa ka-it wa chongchit u embynta hei por Bamphalar wei wow kitkhia leh u pynjanai chooh chooh ya kani ka rukom dustur kawa pynyoo yeitæ i man kyrpang ka jaitbru hakhmat ka pyrthai.
Yaka parom lehke Drama wa e pyrtuid ka ‘Dustur’ da thoh wei pyntoh pyntne da u Phrangsngi Shullai kawa man sakhiat ka parom wa e chiboon i sneiñ i kroo ya kiwa wan pait wan sakhi najan najngai.
Discussion about this post