Chongchit ka lehkmen Independence Day ha Jowai da ki yalehke wa har rukom

Ka 80^th Independence Day da lehkmen ka deiwa chit mynsien ha madan Jrisaleiñ, Chutwakhu, Jowai heiwa u Speaker, u Thomas A Sangma da wan u wow pynhær ya ka lama ka ri kamjooh wow chim ya ka Rashtriya Salute ya kiwa chimbynta ha ka March Past.

Waroh da em 35 tylli ki dhab wa chibynta wa kynthup ya ki District Police Jowai, ka 42 Meghalaya BN NCC, Jowai wa ki khynnah na ki 33 tylli ki skur.

Yei naam jop ha ka March Past da lai ko cha ka PM Shri School JNV Mukhla kam kiwa yoh nyngkong, hei wa ar da yoh ka Jaintia Higher Secondary School, Jowai katwa hei wa le da yoh ka Thadlaboh Presbyterian Higher Secondary School, Jowai. 

Ha kani ka sngi da yoh leh yei rwai wei chaad tynre wa ki yalehke wa har rukom kiwa klam chaphang iwa jia ha ri.

Ha ka lehkmen wa da pynman ha Hima Shangpung, Laskein C&RD Block ha Hula Playground Moosyiem, Shangpung da wan wow sakhi da ka M Ampareen Lyngdoh, MLA kawa da pynhær ya ka lama ka ri wei da chim ko leh ya ka Rashtriya Salute neibynta ki 18 tylli ki dhab kiwa chimbynta ha ka March Past. 

Yei naam jop ha ka March Past da yoh nyngkong ka Lummuro Higher Secondary School, hei wa ar da yoh ka Shangpung Presbyterian Higher Secondary School katwa hei wa le da yoh ka Shangpung Higher Secondary School Nongrim.