Ka North East Adventist University wa em ha Khliehtyrshi, Thadlaskein da lehkmen ko ya ka National Unity Day kawa tip leh kam ka Rashtriya Ekta Diwas da kawa phooh wa phieñ wei kawa chongchit ha ka 31 tarik u Naichiphaw, 2022 kawa man leh ka lyngkhooh sngikha wa 147 u Sardar Vallabhai Patel, uwa man leh kam u Home Minister wa nyngkong ka India uwa da pynyatylli ya kiwa boon ki hima yow pynkha ya ka ri India.
Ka phang ka lehkmen toh “Unity in Cultural Diversity” namo i yatylli hapyrdi iwa boon ki jaitbru wa ki riti dustur wa pynlai da ka Department of Sociology hapoh i yahkhmat ka Dr. Jemima Maji Marak waka Committee kawa da em da kiwa yahkhmat kiwa klam ya ka ktien ka thylliej waphær waphær.
Kani ka University toh kawa emlang kiwa boon ki jaitbru wei ka thong toh wow pynman ya kani ka yalang kam chibynta wow pynsñiawthooh yei emkaam u man kiwa yatylli wa kiwa sñiawthooh uwi ya uwi hanla phær ki ktien ki thylliej.
Ha kani ka sngi da pynman yei pynyoo rong nadooh ki yung sah tynre, ki chaad, ki yalehke wa ki baam yong ki jaitbru ri-loom waphær waphær ka thaaiñ North East.
Da wan wow sakhi ya ini kam u kongsan da u Wailadmiki Shylla, MLA ka Jowai Constituency, deilang wa L. Dkhar, MDC ka JHADC kam u symbood kongsan wei da emlang leh u K. Rymbai, Waheh Chnong ka Khliehtyrshi.
Neiliang u Wailad da yaroh u yei pynkhreh wow pynman ya ini nadooh wow chna ya ki yung trep, ki riam ki bait tynre kiwa ym toh wa suk u yoh.
Da kular u leh wow leh katwa yei na i dawa wa e cha oo lyngba ka dorkhat deiwa e khublei ya kiwa pynlai kani ka University wa deiwa em ko da ku kani ka thaaiñ.
Da emlang leh ha kani ka sngi wa u Dr. Eliah Srikakoli, Chancellor ka University deilang wa ki bei ki pa ki khynnah kani ka thaw puræ.
Hachwa ini da yoh pdiang ya kiwa chah khut sñiawbha da u Dr. Paul Bhaggien, Vice Chancellor wei da khana yei parom wa tbian ka National Unity Day da ka Phiralynn Kharkongor, kawi na ki Assistant Professor ka University kawa da e leh ya ki kyntien pdiang sñiawbha.
Ha kani ka sngi da yoh yei Chaad Pliang wei Chaad Mastieh da kiwa na Ri-loom Khasi wa Jaiñtia, ka Chaad Wangala na ki Garo, ka Chaad Jhumur, ka Chaad Cheraw ki Mizo, ka Mamita da ki Reang, ka Ememei Dado da ki Mao, ka Sawlakia da ki Mara waka Lagre da ki Santhal.
Da em leh ki yalehke kam ka Rong Biria U Khasi, Wa’pong Sika ki Garo, ka Insaihrui Pawh ki Mizo waka Waa Kabi ki Manipuri.
Da pynkut da ka chaad lehkmen da ki sur tynre wa da chimbynta lang da waroh kiwa da emlang.
