Ka tamasa Rising Sun Water Festival 2022 daw sdang ko mynstep ka 3 tarik ha Umiam Lake, Shillong ya kawa da pynlai da ka Headquarter ka Eastern Command kawa em ya i thaw harood kani ka um wei daw kut ko ha ka 5 tarik.
Ha kani ka tamasa daw em hadooh 150 ngut kiwa chimbynta na ki 22 tylli ki Club kiwa yatoh wa i kaam kiñ lieñ (Rowing and Sailing) na kylleiñ ka ri.
Ka tamasa ha ka 3 tarik u sdang ko heipor 10:00 waje i step heiwa daw wan wai ya ka da u Montri Rangbah ka jylla heiwa daw pynwyrngia ya ki paidbah da ka Isha Som Band, ki chaad Garo wa ka Regimental Brass Band yong ka Indian Army.
Ka Indian Navy leh daw pynyoo rong ko ya ki chipai Special Parachute Regiment Forces dei yarap ka Indian Air Force.
Ya kani ka tamasa da pynman hei krehlang wa ka chnat Meghalaya Tourism wei daw ye leh u pait ya ka lyngba ka YouTube.
Da kyrmen skem leh wa lyngba kani ka tamasa daw pynchlur ko ya ki khynroo wow chimbynta ha ka yalehke Sailing & Rowing neibhah dang duna bha kiwa chimbynta ha kam kini ki jait yalehke na ka thaaiñ mihsngi.
Kani ka tamasa Rising Sun Water Festival man ko leh kam chibynta yong i krehlang ki chipai ka ri wa ki sorkar jylla wow pynlai bait ya ka thong krehkaam “Khelo India” wei wow pynyabi ya ka thaaiñ mihsngi (North East).
