Ka lympung wa 17 ki khynnah Seng Khasi Seiñraij kawa da man ha ka 15 tarik uni u bnai da man ko kawa yoophooh yoophieñ wei chongchit heiwa ki khynnah Niamtre-Niam Khasi na ki chlem sikai waphær yong ka Bri u Ynñiawtrep-Ynñiawskum da wan ki wow ya chimbynta hei riam i bait wa yoochongkun chongkhia.
Ya kani ka lympung da pynman ha chnong Krang, East Khasi Hills District hei pait i pynlai ka Seng Khasi Krang, Diengiei Pyllun wei ka phang kyrpang yong ka toh “Ha la thymmei ban tei ia ka lawei”.
Ka Deitinylla Sawkmie waka Imika Ryntathiang kam kiwa pynlai yong kani ka lympung chwa wow sdang da e ki i pdiang burom katwa ka Naphishwa Kyrsian, Seng Khynnah Seng Khasi Krang da siang ko i ngoohblai ngoohsyiem wei ki ar ngut ki khynnah kiwa da e i klam i kappæ kyrpang ha kani ka sngi toh ka Balaaijingkmen Khongsni, Seng Khynnah-Seng Khasi Wahlyngkhat hajrong ka phang “Ka lawei ki khynnah bad ka Niam Khasi” wa u Skembor Thangkhiew, Seng Khynnah Seng Khasi Mawlai hajrong ka phang “Ka Seng Khynnah ka shlem hikai ia ka tynrai bad ka akor”.
U S. Pyniaidsuk Lyngdoh, General Secretary, Lympung ki khynnah Seng Khasi-Seiñraij khanna pynsñiaw u hapyrdi ki khynnah yei krehkaam kyllum yong ki kam kiwa toh u pait u pynlai ya kani ka lympung katwa u Puramon Kynjin, Dolloi Elaka Jowai wa man kam u President ka Lympung ki Khynnah Seng Khasi Seiñraij e u ki kyntien e mynsien ya ki khynnah wei pyntipmit leh hapyrdi ki khynnah ya u waheh Shape Paswet, General Manager District Commerce and Industries Centre, East Jaiñtia Hills, Khliehriat wa man kam u kongsan yong kani ka lympung.
Kam ka dak i pynkut ya kani ka lympung da em i e kti ya ka Dongmusa na u Bhaboklang Ryntathiang, Seng Khynnah Seng Khasi Krang ha u Waiphang Suchiang, Seng Khynnah Laskein Pyllun wa man ka Seiñraij wow pdiang ya ka Lympung Khynnah Seng Khasi Seiñraij wa 18 ha chnong Nongkynrih, Laskein Block.
Chooh chooh najrong i klam i kappæ da pynwyrngia wei pynchongchit leh ya ki khynnah ha kani ka lympung da ki chaad, ki rwai sur tynre wa kiwi kiwi kiwa man chibynta ka luti wow yohlaad ki khynnah u pynyoo pyrthai yei sap i ka-it yong ki lyngba ki dustur riti waphær.
