Ka Presbyterian English School Sohmynting, West Jaiñtia Hills District, kawa man ka skur wa pait wa pynlai da ka Jingiaseng Samla ka Balang Presbyterian Sohmynting, ynne ka sngi da pynman ko yaka Annual Sports Meet 2023 wa da chimbynta da ki khynnah nadooh Class Nursery hadooh Class 5.
Ki jait lehke Sport wa da chimbynta ki khynnah kynthup ya ka yakob phet pyllah wa 50m, 100m wa 200m, ka Relay Race, ka Sack Race, ka Spoon Race, ka Musical Chair, ka yataan tylle, ka Long Jump wa kiwi.
Ya kani ka Sports Meet da wan wai da u MDC ka thaaiñ u Lakhon Dkhar hei emlang ki waheh wasian ka chnong Sohmynting, ki dkhot ka Jingiaseng Samla Balang Presbyterian Sohmynting, ki dkhot ka School Managing Committee, ki manbei manpa wa kiwi.
Neiliang u Lakhon Dkhar hawa e yei klam da yaroh u yaki bor pait bor pynlai kani ka skur neibhah wa han dang du 7 snem i lai luti ko leh da chynna wa em ko i man kyrpang man phær ha ka, wei kawa ku chakhmat.
Da pynrap u leh wa i ye kani ka skur u ku neipor cheipor toh wa em i bahkhlieh i chimkhia ki bor pynlai, kiwa sikai kamjooh leh ki manbei manpa.
Hawa kyrkhu kyrdoh yow nang ye chooh chooh kani ka skur u e chakri lyngba i puræ puthi, yooluti u leh wa ha ki snem chakhmat ki bor pynlai kani ka skur u wan pynsñiaw ki ha oo yei emkaam yong ki.
Heiyatoh waka lehke Sports won kyntu u ya waroh 4 tylli ki House wa chimbynta wow lehbha ki, neibhah ka Sports leh man ko kawa emkaam u lai lang chirup chirup wei puræ puthi.
I bynta ka Sport toh yarap ko u pynyoh yei doh i pran wa chait wa khiah, katwa i puræ puthi won yarap ko yaka mynried i im u poi cha ka thong ka kyrdan waphær waphær da ong u.
