Jowai : Chi bynta i pynem warom Platinum Jubilee ka skur Govt. Boys Higher Secondary School Jowai, da yoh u sakhi sa ya ka yalehke Final Basketball ki khynnah skur ynne ka 4 tarik.
Ynne ka sngi da yoh u sakhi yei yakop lehke Final Basketball wa da pynman ha pchem kani hi ka skur wada yachim bynta nadooh ki khynnah skur kynthai wa chynrang kamjooh ki wa sikai.
Ha ka yalehke yong ka kyrdan junior ki khynnah chynrang, ka dhab Zebra da pynrem ko ya ka dhab Tiger da 21-6 points. Katwa haka kyrdan Senior yong ki chynrang yei naam jop da rah da ka Panther deiwa pynrem ko yaka Stallion da 19-10 points.
Haka yakhun yong ki khynnah kynthai hapyrdi ki class 12 wa ki class 11, ki khynnah Class 12 da jop ki deiwa yoh point ki 6 katwa ki Class 11 won yoh ki 4 point.
Katwa hei yakhun yong kiwa sikai kynthai yong kani ka skur won hapyrdi ka Team A waka Team B, ka Team A da pynrem kput ko yaka Team B da 10-0 points.
Hadien wa dep ka yalehke da saam leh ya ki prize cha kiwa yachim bynta, kamjooh leh cha ki wa yaleh wa chkeh tam kitæ kynthup ki ya u Golwinson Phawa na ka group Zebra yong ka kyrdan Junior, u Shalangki Bhoi na ka group Panther, ha ka kyrdan Senior, wa ka Iuwanki Lyngdoh na ka kyrdan senior yong ki khynnah kynthai.
Discussion about this post