Jowai: Kam chibynta wow pynchlur ya ki khynroo wow ya chimbynta ha ki yalehke Sports waphær waphær, ka Dorbar Chnong Madankynsaw-Mowkyndeng hei ya krehlang wa ka West Jaiñtia Boxing Association da pynman ki ya ka Fight Night ha ka tai ka chnong kam wow wai luti ya kiwa ka-it ya ka yalehke Boxing.
U M. Buam, Secretary WJBA da pynsñiaw u yei sñiawsih wa duna ki chynrang wa kynthai kiwa yalehke Boxing napoh ka District wei da kyntu leh yaki bru yong ka thaaiñ wow pynchlur ya ki khynnah wow yaleh ki ya kani ka jait Sport.
U D. Shadap CEO yong ka Madankynsaw Boxing Association da ong u wa i thmu wa ha khlieh dooh yong kani ka Fight Night toh wow sdang noh ya kani ka jait sport hapoh kani ka chnong wei da ong u leh wa em hadooh 50 ngut ki khynnah, kynthai wa chynrang kiwa da pyndap ya ki application wow sdang chah hikai noh ki ha kani ka jait yalehke.
U Shadap da yaroh u leh ya ka WJBA wei kamjooh leh yaka Meghalaya Boxing Association (MBA) hajrong i kitkhia yong ki neibynta kani ka kaam.
Ha kani ka sngi da em leh u Joint Secretary yong ka MBA,u J. Shadap, Vice President WJBA, u W. Ksoo, ki Official napoh ka WJBA wa kamjooh leh napoh ka SAI.
Kani ka Fight Night da man ko leh kam chibynta wow pynmih poisa ya ka VDP wei da pynchongchit leh ya kani ka miet da u DJ.
Discussion about this post