Ka San Shnong Cluster Level Federation SHG Multipurpose C/S Ltd. da pynman ko ya ka yalang wa chisien chi snem namo ka Annual General Meeting ha chnong Mutong heiwa ya ka yalang da pynlai da ka President, ka Iasain Sana wei da yoh i klam pdiang burom na ka Doni Phawa kamjooh i sur rwai na ka Nangkiew V.O. Cham Cham.
Ha ka yalang da yoh i klam na ka Secretary, ka Nadona Dkhar kawa da khana yei lai luti ka seiñ.
U MDC ka thaaiñ, u Lasky Rymbai hawa e i klam kam u symbood kongsan da ong u wa ha ki por wa dadep ym jooh yoh u wow chimbynta tangwa sñiawkmen u wa em kiwa yahkhmat ki khynthai napoh ka Constituency yong oo wa mih ki wow mihkhmat nadooh na ka District, ka State Level hadooh ka National Level.
Neiliang won u MLA ka thaaiñ uwa man leh u Montri ka sorkar jylla, u Kyrmen Shylla da ong u wa da pynhun sakhiat ki CLF nadooh ki rukom booh yukheiñ ki SHG VO wa ka CLF heiyatoh wa i rukom e ram cha ki SHG.
Da sñiawkmen bha u wow ap yei rukom pynlai kiwa kreh hapoh ka CLF khamtam deiwa booh thong wow pyndooh ya ki dawai (Chemical) wei toh u pynchlur u pynemkaam da ki sboh wa mih na ka ramaw hi hawa thung jhoor.
U Kyrmen da yaroh u leh ya ka Runita Phawa kawa man ka CCC Cluster Coordinator kawa da ye sakhait u man kawa yaichah wow pynlai yei rukom krehkaam ka CLF ryngkat wa ki dkhot waroh.
Chwa wow pynkut ya ka yalang, ka Vice President, ka Bial Dkhar da e ko ya ka dorkhat ha u Kyrmen wa u Lasky kiwa da kular wow thooh laad kammon wow yarap ya ka CLF.
Discussion about this post