Shillong: Ka Meghalaya Baby League (MBL) ynnin ka sngi da sakhi ko ya kiwa boon ki yakhun wa ya thaiñ bha wei ka yalehke leh da man ko kawa da ku kyrdan na ki khynnah wa wan chimbynta.
Ki yalehke wa sdang toh hapyrdi ka Mawlatbah SC Hawks waka Little Star Clouded Leopards. Ka Little Star Clouded Leopards da jop nyngkong ko da ha ka kyrdan wa 4-5 snem da 6-0 tangwa ym ye de ko wow jop ya kiwi ki yalehke ki. Ki Hawks won da jop ki arsien da 2-0 ha ka kyrdan 6-7 snem wei da jop biang ki 6-4 ha ka kyrdan 10-11 snem wei ki ar tylli ki yalehke yong ki da kut ki khlem em wa yoh u thap kool.
Ha pyrdi ka Sunnydale School Doves waka Nongtrai Cheetahs, ka Nongtrai da jop ko le sien wei da rem ko chisien wei da ya drawn ko chisien.
Ka Nongthymmai GC Scorpions da sdang ko da i jop pyrchah ya ka Wahlakhiat Bulls ha ka kyrdan 4-5 snem wei da jop won ko ha ki 4 tylli ki yalehke wa bood.
Da em leh ar tylli ki dhab wa jop ya waroh ki yalehke yong ki ka ENE Falcons kiwa yalehke pyrchah ya ka Unified Gorkha Gators waka Touchline NE Cubs kiwa yaleh pyrchah ya ka JNS Jaguars. Ka Touchline NE Cubs da thap ki hadooh 51 tylli ki kool ha ki 5 tylli ki kyrdan yalehke.
Ki Jaguars waki Gators hap kreh chitom ki wow lai cha khmat wei dang em i por wow leh ki ya ini.
Discussion about this post