Chongkhia i lehniam Kymphui ka Raij Mynsoo

Jowai : Wow yoh yei mon i khe ki Blai ki syiem kamjooh wow yoh ki khon ki rayot ka Raij ka chnong yei chongsuk chongsaiñ, i miat i bha, i roi i paar liang wanang, ki bor pylai ka Seinraij Niamtre Mynsoo dachim ki wow pyndep ya ka lehniam Beh Kymphui næ Beh Klam. Kani toh kawi na ki rukom lehniam wada leh da pyndep chisien chisnem hapoh ka Raij Mynsoo da ki bru wa em i ngait ha ka niamtre, ka niam wayah watyoor ki warim, manchwa longchwa.

Ha uni u snem ya kani ka lehniam næ ka kñia e ngooh da leh da pyndep ha ki le sngi iwa man nadooh ka sngi Musiang 14 tarik, sngi Muchai 15 tarik wa ka sngi Hat 18 tarik uni u Naikhyde.

Katkam ka wyrta khubor wa yoh da ong wa ya kani ka lehniam Beh Kymphui kawa man ha ka sngi Thymblieñ 18 tarik ha chiteiñ sngi u Langdoh  u waheh Chaniah Langdoh wa u Pator u waheh Salat Myrchiang dachim ki wow pynchong pynthiah ya ka lehniam ha yung Langdoh chirup wei synranlang ki khon ka Niamtre nadooh ki khian hadooh ki heh iwa man hapyrdi ka pliang ka naar wa uwa suit wa choor iwa man katkam ka rukom wa pynjooh da sikai ki waheh na warim.

Related posts

Pynman ka Modop Nartiang yei jied waheh chnong

May 31, 2025

Pynthymme ka Dorbar Chnong Pynthorlangteiñ ya kiwa kitkaam

May 27, 2025

Hadien wa dakut ka leh niam na yung Langdoh ki khon ka niamtre hapyrdi i rah ya ki Sakymphui da mih ki na yung Langdoh dei wa yah ya u Masi Kñia tymbut luti hadooh wapoi ka thaw leh niam wa tip kam ka Dieñyirngam.

Heini i thaw ya ka lehniam da pyndep da u waheh Lang Mynsoo Wasan Ka Raij, katkam ki dak ki chin yong ka lehniam da ong wa i kñia i khriam nadooh wa sdang hadooh ynne ka sngi man i iwa miat wa bha wei hun blai hun syiem, tæ kam wa miat wabha ka leh niam ha uni u snem ki khon ka Raij ka chnong  yooluti ki leh wa i suk i saiñ, i miat i bha, i roi i paar, i phooh i phieñ hapoh ka chnong ka Raij ha waroh ki liang u wan i deilang wei kyrkhu khyrdoh u Tre-kirot.

Ya kani ka lehniam ha uni u snem dawan leh wow sakhilang da u Dolloi ka Elaka Jowai u waheh Puramon Kynjin hapyrdi i emlang u Secretary ka Seinraij Mynsoo u waheh Washington Shylla u President ka Seinraij Mynsoo u waheh Mali Myrchiang wa kiwi tawan ki waheh wasian yong ki khon ka Niamtre na kiwi ki Raij ki chnong.

Photos by Soolangki D Laloo