Ka lehniam wa Soo Sngi Le Yaaw ka Behdieñkhlam ka Raij Jowai ynne ka sngi wa soo da poi ko chawa kut ha Aitnar heiwa da man ko kawa chongkun chongblai.
Ynne dang step ki khon ka Loompyrdi Iongpiah da pyndep ki ya ka Kyntiñ Khnong ha Yung Langdoh wei manda dep neini da pyndep ya ka choh thyndai ha waroh ki yung ha Khonraij wa ha Kmairaij.
Hadien ini heipor nohchariñ sngi, ki Kmairaij da pynkhreh ki wow pynhiar ya ki Rot ki Rong ha Syiem Aitnar heiwa da wan sakhi da ki phaw hajar ngut na kylleiñ ka jylla, ka ri wa na baar ri.
Ha Aitnar da wan sakhi da u Symbood Montri Rangbah ka jylla, u Sniawbhlang Dhar hei emlang ki Montri ka sorkar jylla kam u Kyrmen Shylla, ka Dr. Ampareen Lyngdoh, u MLA ka Jowai, u Wailadmiki Shylla wa kiwi.
Ki Khonraij hadien wa dep i choh thyndai da tympra ki ya ka Symbood Khnong wei heitæ ki Kmairaij leh da sdang ki wow pynhiar ya ki Rot ki Rong le tylli yeiwa da pynbood i e ya ka Symbood Khnong heiwa ki khon ka Raij knieh ki wow tba ya ka wow yoh yei kyrkhu kyrdoh.
Ha uni u snem ki Rot ki Rong da e Wyrta Chula ki ya ki kyntien wa har rukom nadooh i e burom ya ki chipai ka ri heiyatoh wa ka Operation Sindoor, i chah ktah ha ka Social Media, i chah ktah ka rymaw wa kiwi kiwi.
Hadien wa da pynhiar lut ya ki Rot ki Rong ki Khonraij da e ki sa ya ka Khnong Blai heiwa ki dap chynrang waroh yaknieh ki wow tba ya ka wow e ngooh wow paan yei kyrkhu na ki Blai ki Syiem.
Hadien wa kut na Aitnar da pyndep ya ka Datlawakor heiwa ka dhab u Langdoh wa mihkhmat ya ka Pynthor Wah da man ko kawa jop wei katkam i ngait ha uni u snem u kba u hoi u ha Pynthor Wah.
Discussion about this post