15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Chongkun chongkhia i kynmoo warom ki khynnah skur ya ka sngi yap wa 158 u Kiang Nangbah

Advertisement ad1

Jowai: Ki bor pait bor pynlai ka Seiñraij Lower Primary School, Mukhap ha kani ka 30 tarik Kmaichonglad kawa man ka lyngkhooh snem sngi yap wa 158 u Kiang Nangbah kam chibynta wow riñ yei pyrkhat pyrdaiñ ki khynnah chaphang ki kaam wei man i long yong oo ha kam kani ka sngi, da khut pynman ki ka yalang kynmoo warom wa kyrpang deiwa bood ryntih ya ki kyndong ka sorkar.

Ha kani ka yalang kynmoo warom wa man ha chnong Mukhap chirup ki khynnah da wan sakhilang leh da u Nujorki Sungoh, MLA ka thaaiñ kam u kongsan, u W.G. Sungoh, MDC-JHADC kam u symbood kongsan wa kiwi ki waheh wasian ka chnong Mukhap.

U H. Sungoh uwa man kam u Chairman ka School Managing Committee kam u chongknor yong kani ka yalang da e u ki kyntien pdiang burom neitæ kam ka dak i kynmoo warom kynmoo maya ya U Kiang Nangbah wa ya kiwi kiwa yaleh ka ri da em i suki wa chipor neitæ da pynbood won i ngoohblai ngooh syiem da u S. Lapasam katwa ka K. Niang, Head Teacher, Seiñraij LPS Mukhap hawa kut da e ko ki kyntien sñiawngooh.

Ha kani ka sngi yei parom wa tbian chaphang u Kiang Nangbah da klam da khana da u Teibormi Papang, Secretary School Managing Committee katwa u W.G. Sungoh, MDC JHADC  kam u symbood kongsan hawa klam da ong u, kam ki pateiñ ka jaitbru ka ri kiwa im ha kani ka juk wa katni toh u bood i ya ki dieñkjat dieñkti u Kiang Nangbah dei wow man i kiwa chakri hok, kiwa chlur wei em i mynsien yatylli.

Kam kiwa mihkhmat hapoh ka yung Dorbar Chna Aiñ yong ka JHADC, ong u dap u dei sñiawkhia wow yoo u chem wa ha kini ki sngi ki por wa katni i yoh kyrpang ka jaitbru ya ka Six Schedule man i iwa em hapyrdi i maa neidaw wa ha kiwa boon ki khep i hok yong i kam ki jaitbru wa kyrpang næ jaitbru wakhian paaid dooh, kamtae ha kam ini i por emkaam bha wow man i ka jaitbru wa yatylli wei yatoh yumut kamwa u Kiang Nangbah da thwat luti u chisien ka sngi.

U Nujorki Sungoh won hawa klam kam u kongsan da ong u kam ki khon ka ri em i chiboon ki bynta wow leh neibynta i miat i bha ka jaitbru wa khian paaid ka yong-i wei da e mynsien u leh ya ki khynnah wym hoi u man kiwa dooh i kyrmen hei rta pyrthai hawa leh ya kiwon kiwon ki kaam wei man leh ki bru watip u sñiawngooh burom ya kiwi kiwa leh bha ya i.

Chooh chooh ha kani ka sngi da em leh i ekti ya la Muhor Sahnaam cha ki khynnah wa ya chimbynta heini i leh warom wei da pynphooh leh ya kani ka sngi da i purae kyntien da ki khynnah chaphang U Kiang Nangbah wa i chaad dei sur wa yatoh wow Kiang Nangbah.

Share this:
Previous

Phah ka Air Force da ki Helicopter yow tympleh yei iñ i khloo ka Dzukou Valley

Next

Pynsah naam ka Ummulong yaki Soo Kur wa wan seiñ yaka chnong