Kamwa jooh man khlieh ki snem, ynne ka sngi ki khon Niamtre ka Raij Mynso da pyndep ki ya ka Lehniam Chaad Tyllu kawa man ka lehniam chwa wow hiar rep ki cha hali wei ya kani ka lehniam da pynman ha Madan Dieñtyllu, Mynso A.
Kani ka lehniam ha uni u snem da sdang nadooh ynnin i miet da i Chaad Synyaw na Loom Iariang wei da kynrud kajiak chisien dei dien hadooh wa poi ha Madan Dieñtyllu chirup i tem ya ka ksiñ, ka Lakudiah wei put ya ka chawiang.
Du hadien wa pyndep ya kani ka lehniam ki khon ka Raij da ye ki wow hiar cha hali wow rep.
Chwa wow pynman ya i Lehniam Chaad Tyllu ynne ka sngi da em ka yalang wa pynlai da u Elington Sungoh uwa man kam u Waheh Chnong heiwa u Arwotki Sumer u General Secretary ka Seiñraij Jowai da man u kam u kongsan hei emlang leh u Moonlight Ktung kam u symbood kongsan.
Ha kani ka sngi da yoh ya ki kyntien ngoohblai na u Ebrialty Sungoh, ki kyntien pdiangburom na ka Synchar Passah wei da pynbood da ki kyntien lamphang na u W. Shylla.
U Moonlight hawa e yei klam da yaroh u ya ka Khynroo Khyllood Committee ka Seiñraij Mynso kawa da ye u pyndep ya kani ka lehniam wei da kyntu u leh ya ki khon ka Niamtre wow man kiwa yatylli wei wow skem i ngait ha i thij i pyrkhat wa ka niam.
Da kyntu u leh ya ki wow man ki kiwa ksoh ya iwa yah kiwa rim kiwa nachwa khnang wow neh ka pateiñ.
U Arwotki Sumer hawa e yei klam kam u kongsan da ong u wa e wa kani ka lehniam u man ko kawa laibait chwa wow hiar rep khnang wow miat wow bha wow dap wow biang manda hiar li ah ya u kba. Da ong u wa ka Seiñraij Jowai jooh kmen ko u ap u sñiaw ye ki kaam wa leh ka Seiñraij Mynso wei em ki por leh sñiaw wyrai wow tip yeiwa chah lehbeiñ ki.
Chooh chooh da pyntip u wa neini chaphrang heipor wa pyndap ya ka Census namo kawon kawon ka Form wow pyndap ya ka niam kam ka Niamtre wei u Code yong ka toh 7.1.
Kiwi kiwa da e yei klam ha kani ka sngi toh u Kamniapia Challam, u Dolloi ka Elaka Mynso u Karmi Myrchiang, u Hamjhan Dkhar, u Pynhunchemi Chen wa ka Mina Laloo wei da pynkut ya ka yalang da ki kyntien khublei na u Kynmoo Situng.
Hadien ka yalang ki khon khynroo khyllood da Chaad ki deiwa ksoh-kti langdong deiwa syuiñ langdong katwa kiwa put ya ka chawiang wei kiwa tem ya ka ksiñ wa ka Lakudiah won yieñ ki hapyrdi.
Manda dep i chaad ki khon ka Raij da pyndep won ki ya ka Kñia Syiem Tyllu hapoh i pait i yoo u Dolloi, u Pator wa kiwa heh wa sian heiwa da kñia da u sniang.
