Jowai: Ka Ladthadlaboh Dorbar Chnong da pynhiar pyrda ko ya ka lehkmen Platinum Jubilee Celebration namo ka lyngkhooh dap 75 snem ka chnong nadooh wa seiñ ya ka heiwa ka leh kmen da sdang ko nadooh u Duiyatra (Jan) ynnin u snem 2017.
Ha kani ka pynhiar pyrda da wan u Dolloi ka Elaka Jowai uwa man kam u kongsan uwa yaroh ya ka Dorbar Chnong kawa lai luti katkam ka aiñ heiwa hapoh ka Elaka Jowai da em kamwa 82 tylli ki chnong wei heipor wa chimkti u kam u Dolloi 52 tylli toh kiwa da tipmit da ka JHADC wei katni da ku cha 72 tylli kiwa pynyoo katwa dang lai ki sngi ki por ki chong ki thaw da sdang che ki.
Da ong u leh wa emkaam ka aiñ wow yada ya ka bor synchaar wei emkaam leh u em chirrup, u yatylli yow pynman ya ka pyllai chnong kawa jop.
Da pynknmoo u leh wa ya ki chnong wa da kha da mih naka Ladthadlaboh wym toh u mylliñ ki ya ka bei yong ki.
Katwa ya ki khynroo da kyntu u ya ki wow krehchitom ki neibynta ka lehkmen dap 100 snem ka chnong.
Ha kani ka sngi da yoh ya i parom tbian ka chnong na u CHL Nongtdu uwa man uwa chong chnong wa da heh rta uwa da kynmoo yeiwa da kylla hapoh ka chnong wei nadooh na wa sdang kiwa chong chnong toh kiwa chong suk chong saiñ wei kiwa yakrehlang neibynta ka chnong.
U JM Paswet uwa man kam u Chairman ka Chnong Ladthadlaboh da pynchlur u ya ki khynroo khyllood wow krehchitom ki wow ku kyrdan ki ha waroh ki kaam wa yaleh ki wei da kyntu leh wa ym hoi u smat u chong kurim wei emkaam chwa wow pyndep ya ka puræ puthi.
U Waheh Chnong ka Ladthadlaboh u LD Lakiang hei klam yong oo da ong u wa ka chnong Ladthadlaboh toh kawa heh bha wei da pynkha ko leh ya le tylli ki Chong wa pura katni ka Caroline Colony, Tyndowapung wa Lumpariat kiwa katni da yoh ki u synchaar pyn da ki ya ki hi wei dang em leh sa ka Dongmihsngi, Mookyrdup waka Salaroh kiwa da pynkhreh wow man ki kam ki chnong wa pura wei heijooh i por da em boon ki kyntoit wa thymme wa mih hapoh Ladthadlaboh.
Ha kani ka sngi da pynkup burom leh ya kiwa ksoh kaam ka chnong wei neiliang ki dkhot ka chnong da e ki leh ya ki rwai ki chaad wei da em leh i rwai kyrpang wa da chna da ka Thaiwan Arts and Cultural Organisation, i chaad pliang naka Seiñraij Jowai wa kiwi kiwi.
Ha kani ka sngi da ah leh ya u Cake dap 75 snem ka chnong da u KD Syngkon wei da yoh leh ya ki kyntien sñiawngooh na u R. Nongrum uwa man kam u Secretary ka PJCC.
Discussion about this post