Jowai: Kam wa man ha kiwi ki thaw ka ri India, ka Meghalaya Bharat Scouts & Guides West Jaintia Hills leh ynne ka sngi da pynman ko yei leh burom kyrpang yei dap 74 snem i yoh laitlooid ka ri nae ka Independence Day.
Da sdang yei leh burom ya kani ka sngi nadooh i step deiwa pynhær ya ka lama le rong ka ri hei chimbynta ki Scouts Master, ki Scouts Guides wa ki Rover-Ranger neitae wan ka bynta wabood hei sngi da em ka yalang lehburom watbian hei pynlai u Ohiwot Laloo District Secretary MBS&G West Jaintia Hills District heiwa u Adiam Bthuh, Jt. District Secretary MBS&G West Jaintia Hills da e u ki kyntien pdiang burom katwa u Elvis Dkhar, District Organiser (Scouts) heiwa kut e u ki kyntien khublei.
U W. Lyngdoh, Jt.State Secretary MBS&G State Headquarter Meghalaya Shillong hei e kyntien heiyatoh wa kani ka sngi da yaroh u yei kitkhia ki bor pynlai ka District wow pynman ya kani ka prokram ha kam ini i por dei was bood ryntih leh ya ki adong ka sorkar.
Neitae hei pteiñ yei klam da ong u, kam ki tre ri tre muluk toh i kamram yong i wow embyntalang ha kam kani ka sngi wa khroo wa kyrpang ka ri kawa man chibynta ka dak wow kynmooo warom u ñiawtang ya ki kiwa yaleh ka ri kiwa da embynta ha ki dur ki rukom yaleh waphær kat hadooh wow yoh ya kani ka sngi.
Chooh chooh e mynsien u leh ya ki dkhot ka seiñ waroh deiwa ong, hapyrdi i tynjooh yong kani ka juk ka por wa man leh ki moochynthut yei kap i lai ka rI chakhmat toh u man i ki bru kiwa tip u im deilang wei yah ka juk ka por khamtam wow pynemkaam da ki buit stat yong kani ka juk ka por (Technology).
Da pynchoh pynkyrpang chooh ya kani ka yalang dei sur rwai maya ri na ki khynroo, i ekti ya ki Prize cha kiwa jop yong ka yakob dro wa da pynman ha ka 14 tarik, i pynlait ya ki Mask wow saam paidbah wa da e sñiawbha da ki dkhot ka seiñ wei i pynyoo rong leh ya ki Scarf, ki Badge wa ki rukom dro dur yong ki khynnah wa yatoh wa ka Independence Day.
