Shillong: Kam chibynta wow wanrah yei yatylli hapyrdi ki khon ka Ri-loom Jaiñtia kiwa em ha nongbah Shillong, ha uni u snem leh ka JSU-Shillong Circle da pynman ko ya ka yachemlang kawa tip leh kam ka All Jaiñtia Meet 2019.
Ya kani ka yachemlang da pynman ynnin ha Anton Hall, Laitumkhrah, Shillong hajrong ka phang “Chirup u yakrehlang yow bet u chara ya ka mynried”.
U MLA ka Jowai, u Wailadmiki Shylla ha kani ka sngi da man u kam u kongsan hei emlang ka DC ka South West Khasi Hills, ka Isawanda Laloo, u T. Blah kam u bru chemphang wa kiwi kiwi ki khynnah kamjooh leh kiwa chong wa sah ha nongbah Shillong.
U Wailadmiki hawa e yei klam da yaroh u ya ka JSU wa da pynman ko ya kam kani ka yachemlang neibhah kani wanrah ko yei yatylli hawa em na jngai na yung na sem.
Neiliang ka seiñ ha kani ka sngi da pynkupburom ko leh ya ki khynnah wa pass bha ha ki exam waphær waphær kamjooh leh ya ki khloor yalehke sports na ri-loom Jaiñtia kiwa da jop ha ki lympung yalehke sports waphær waphær hapoh wa cha baar ka ri.
Da pynkup burom kyrpang leh ya ka Amibilis Mulieh ka khynnah kawa ym chynna kawa da ye u pyndep ya ka kyrdan puræ BA na ka skurbah NEHU.
Ya kani ka yachemlang da pynphooh da ki chaad ki rwai wei iwa kyrpang dooh toh i pynyoo sap da ki khynnah ka skur Ferdy School of Martial Arts (The Revolution MMA) kawa da pynlai da u khloor yalehke Martial Arts na Ri-loom Jaiñtia, u Ferdinand Suchiang ha Shillong.
Discussion about this post