Jowai : Ka Raij Ialong ynne ka 12 Naisaphra da pyndep ko ya ka lehniam Behdieñkhlam yong ka hei wan sakhi da ki spah ngut ki bru wa wan na kylleiñ ka ri-loom Jaiñtia.
Ya kani ka lehniam ka Raij da sdang nadooh ka Muchai 4 tarik uni u bnai heiwa da pyndep ya kiwa boon ki lehniam kam ka Kñia Khang, ka Kñia Bhang wa kiwi kiwi.
Ynne ka sngi pynkut ya ka lehniam, ki khon ka Raij da wanrah ki hadooh 11 tylli ki rong næ ki rot wa da wanrah na kylleiñ ki khon ka Raij kam na Wahiajer wa na Ialong.
U Montri ka tnat C&RD ka jylla, u Sñiawbhalang Dhar da man u kam u kongsan hei emlang u MLA ka ka Sutnga Saipung u Chitlang Pale, u MLA na Jowai u Wailadmiki Shylla, u CEM ka JHADC u MB Rymbai, ki MDC ka JHADC kam u u C. Garod, u Marki Mulieh, wa kiwi kiwi wei da em leh u Dolloi ka Elaka Jowai, u Puramon Kynjing, ki heh na ki Seiñraij waphær waphær.
Hadien wa da pynhiar ya ki rong ha Aitnar da em ka Taan Bhang wei ka Tyngkheiñ Bhang kawa mut yow pyn-eh nasib ya ki khon ka Raij.
Manda dep na Aitnar ki waheh wasan da pyndep won ki ya ka Kñia Duwan ha Khlooblai ka Raij Ialong.
Discussion about this post