Chongkun ka Behdieñkhlam ka Raij Muthlong chirup ka wyrta chula wow yakhun yei drugs

Ynne ka sngi, ka Seiñraij Muthlong da pyndep ko ya ka lehñiam chaad Behdieñklam wa chisien chisnem yong ka ha Biar Nohrong Thadmuthlong, West Jaiñtia Hills District deiwa ya chimbynta chongchitlang ki khon ka Niamtre na ki Raij waphær waphær.

Kani ka chaad niam Behdeiñklam toh kawa da jooh pynman pyndep khlieh-u-snem da ki bru Pnar kiwa bood ya ka Niamtre wei ka yurim yong ka hi toh u beh yaka khlam, ka dait, i kjut chitom wa ki sih wa boonjait haka imlang sahlang.

Ha kani ka Behdeiñklam najrong kiwa yahkhmat ñiam na ki Raij ki Elaka waphær, da wan sakhi leh da u Comingone Ymbon, Montri sorkar kam u kongsan, u MLA warim ka Khliehriat, u Justine Dkhar kam u symbood kongsan uwa da wan heithaw yong u Montri ka sorkar jylla, u Kyrmen Shylla.

Da emlang leh u Dolloi ka Elaka Jowai, u Puramon Kynjing, u Dolloi ka Elaka Shangpung, u Chanki Langbang wa kiwi.

Ha Biar Nohrong da em ka yalang wa pynlai da u E. Lyngdoh heiwa da yoh i batai chaphang kani ka Behdieñkhlam da u Kathauni Ymbon.

U Justine Dkhar hawa e i klam da ong u wa ka Behdieñkhlam katni ymtoh du wow beh ya ka kjut ka khlam tangwa u beh yeiwa sih ha ka imlang sahlang nadooh i drugs, i kiad, u bhang wa kiwi.

Neiliang u Comingone da kitbok u ya ki paidbah heiwa yoosuk u wow yoo wa dang boon kiwa chimbynta kat dang mih ki snem deiwa ong leh wa emkaam u pynneh ya ki kaam ki bru yong i.

Da ong u wa i roi i kjut kattæ toh i drugs iwa dang joor kat dang mih ki bnai heiwa da ong u wa i em kiwa dih drugs ha ka yung da pynman ko ya ka yung kawa jinjar tam deiwa khutlang ya ki manbei manpa wow pait ki wym toh u ngop ki khon ha i drugs.

Chooh chooh da kyrpaad u wow pynneh pynsah ya ka ramaw wa ki soodong sookun khnang wow suk ka mynried heiwa nachwa ym jooh em ki um klong tangwa katni neidaw wa sngat ki um kamtæ da hap wow thied um.

Deilang ki rot ki rong wa da pynpoi hapoh Biar Nohrong Thadmuthlong, ki khon ka Raij da wanrah haroh ki ka wyrta chula cha u paidbah hajrong i sih na i drugs, i chah kdoh ki bru ha ki Mobile Phone wa kiwi kiwi.

Ha waroh da em 17 tylli ki Rong wa da wanrah da ki chnat ka Seiñraij Muthlong kam ka Unit Club Lumpyrdi, Mooknor Cultural, Madanthad, Liarlulong, Muchut, Phramer; ka Seiñraij na Mukhap, Pammanik, Rashau, Latymphu, Thadsnieng, Moobandu, Chnat Unit Club ka Mukoichyrwang, Phangrangngam, Lumchyrmit wa Suchiang Lumpareng.