Jowai: Ka Chaad Sukra ka Raij Ialong da pyndep ya ka ynne ka sngi kawa man leh kam chibynta ka lehniam Thohryngkaw kawa kynthup leh ya ka Nohsakyriat kawa da pyndep ynnin ka sngi ha ka jooh ka thaw ka Madan Langdoh wa em ha Ialong.
Ya ka Chaad Sukra ynne ka sngi da wan wai ya ka da u CEM ka JHADC u Moonlight Pariat uwa da ong waka Chaad Sukra man ko kawi na ki rynsan wow pynyoo pyrthai hadooh katwon mahajon ka dustur riti ka jaitbru Pnar kawa ye leh u man kam kawi na ki daw wa kiwa uiñke suwari u wan ki cha ki chnong ki thaw yong i lyngba ki chaad wa ha rukom wa ye u pynyoo pyrthai.
Da pynkynmoo u leh ya ki paidbah wow man ki kiwa yatylli wei ha kani ka kynti neidaw wa ympu slem yoh u man kam u CEM kamtæ da ye u e yarap T. 20,000 lyngba ka JHADC katwa ya ka Behdieñkhlam ka Ialong won kawa dang yoh por u pynbiang poisa da kular u wow e T. 1,00,000.
Kamtæ da pyn-eh bok eh nasib u wa ka rep ha uni u snem u ye ko u pyndap yeiwa emkaam.
Ha kani ka Chaad Chukra ki dong ka chnong Ialong kamjooh kiwa wan naka chnong Wahiajer wa na ka Raij Nongkhyllep da pynyoo ki ya ki chaad tynre wa ha rukom kam ka chaad pliang, chaad rep, chaad kylleiñ kti wa ki chaad yong pyrthai.
Hei miet won da pynman ya ki yalehke (Drama) wei daw pteiñ sa ka wi ka lehniam chwa wow pynhaap symbe ka wow pynman ha pynthor ka wow pynman ha kani ka 25 tarik.
Discussion about this post