Ka Chaad Sukra ka Seiñ Raij Nangbah da man ko kawa phooh wa phieñ kawa da pynman ynne ha madan Duwan Kñia Blai Iawmusiang Nangbah kawa da wan chimbynta da waroh ki khon ka dong ka chnat napoh ka Seiñ Raij Nangbah chirup wa ki riam ki bait wa ki chad ki rwai wa chongkun.
U kongsan wa wan wai ya kani ka Chaad Sukra ynne toh u MDC ka Shangpung, u J. Treilang Suchiang deiwa emlang u Lakhon Biam, MDC ka Nangbah heiwa ya ka yalang da pynlai da u R.M. Garod, Dolloi ka Elaka Nangbah uwa man leh heijooh i por u President ka Seiñ Raij Nangbah chirup wa u Kordor Lamare, General Secretary ka Seiñ Raij Nangbah.
Ha kani ka sngi da yoh chwa ya ka ngooh ka dem na u Deibormi Thubru uwa man u Pator ka Raij Mukhla dep tæ bood sa ka klam pdiang burom da u Mario Biam, Asst. Secretary Seiñ Raij Nangbah, da yoh leh yei klam wa tbian na u Chemhok Garod, u Wom Chyrmang, President Seiñ Kyntu Seiñ Raij 12 Daloi, na u Kamai Susngi, wei da yoh leh yei klam sneiñ kyntu na u Tonroi Iongwai, u Waheh Chnong ka Nangbah.
U Standbyme Sari, General Secretary ka Dorbar Chnong Mukhla Nongrim da klam u hajrong ka yurim wa ki khon khynroo khyllood ka Seiñ Raij wymhoi u maya ki ya ka ñiam ka rukom du heipor wa em kam kani ka chaad ka kmen næ ka rwai ka siaw tangwa toh u maya ki ia ka ñiam ka rukom deiwa tip ki u lehñiam leh rukom lada ha chnong ha thaw næ ha yung ha sem.
Katwa kamtæ da kyntu u ya ki khon khynroo ka Seiñ Raij toh u mih ki chakhmat yow pait lang ki chirup wa ki waheh wasian heipor wa em ka lehñiam leh rukom hapoh ka chnong ka Raij næ la ha ki yung ki sem leh.
Waroh ki waheh wa da klam hajrong ka phang yong ka Chaad Sukra da ong ki leh wada toh u thooh ki laad ki luti wow pynneh pynsah ya ka dustur riti, ki sur ki rwai tynre, ki chaad yongrim.
Neiliang u J Treilang Suchiang hawa e yei klam da yaroh ki ya kiwa yahkhmat ka Seiñ Raij Nangbah kiwa da ye u pynlai bait ya kani ka Chaad Sukra man-u-snem wei kamjooh leh da kyntu ya kiwa put wa tem wow nang kreh chitom chooh chooh ki u sikai put sikai tem wei khamtam da kyntu u leh ya ki khon khynroo ka Seiñ Raij Nangbah u wan ki chakhmat hei wow chah sikai ha ka put ka tem tynre khnang wa kani ka dustur yong i yow lait ko u wiar u dooh u dam.
Ya ki kyntien e khublei da e da u Kordor Lamare, General Secretary Seiñ Raij Nangbah, da pynchongchit ya kani ka Chaad Sukra da ki chaad tynre na ki 7 tylli ki dong hapoh ka Nangbah chirup wa ki seiñ manbei ka Seiñ Raij Nangbah.
Da wan wow chimbynta lang leh da ki khon ka Seiñ Raij Mukhla na ka chnong Mukhla Nongrim, kamjooh leh da ya chimbynta da ki khon khynroo ka Seiñ Raij Muthlong.
