Jowai: Ka Kiang Nangbah Iasiat Khnam Memorial Society (KNIKMS) ynnin ka sngi da lehwarom ko ya ka lyngkhooh dap snem wa chah pasi u khlawait ka ri-loom Jaiñtia u Kiang Nangbah ha Madan Madiah Kmai Blai Syntu Ksiar.
Ha kani ka sngi u SP ka WJH u Vivek Syiem da man u kam u kongsan hei emlang u Asst. Director ka Arts & Culture ka jylla u Dr. P.L. Marwein.
Ya ka yalang da pyllai da u Jait Da-oo Sumer uwa man kam u President ka seiñ, heiwa da yoh leh ya ki kyntien ngooh blai na u E.S. Kynjing.
Kam u kongsan ha kani ka sngi u Syiem da ong u wa chwa wow wan ki pharæng cha ka ri Pnar da em chwa i pyrchang da ki Syiem Ahom heiwa ha kitæ ki por u Syiem Jaiñtia da yieñ u wow pyrchah ya ki, da khana u wa hadooh katni leh dang em ki dak ki chin harood ka wah Kolong waka wah Kupli wei kitæ toh i sdang yong i yaleh pyrchah i thombor ha kiwi ki jaitbru næ ha kiwi ki hima, wei hadien wa ka hima Ahom da sdang tlot ko haka riti synchaar yong ki neitæ da wan sa kiwa na Burma naka hima Awa heiwa ki chipai Burma dawan ki hadooh u pood Jaiñtia heiwa heitæ leh dei mynsien dap chynrang ka thaiñ Jaiñtia da mih ki wow pyrchah.
Kamtæ hadien kattu katni snem da wan poi won sa ki pharæng deiwa wanrah leh i synchaar embor heitæ won mih u Kiang Nangbah wow pyrchah yei thmu khrong khajna, i chah yoobeiñ ha kiwa boon rukom.
I daw wa pyrchah u ymtoh wa yoosih u ya ki dohlieh toh neidaw wa maya u ya ka ri, kamtæ toh u bood ya ka nongmuna yong oo wow maya ya ka Ri wei haka sngi wa khaddooh leh dang yaleh pyrchah u dei mynsein len lade.
Hawa yaleh yei bha em bait ki wow pynthut wow bichni ter ter tangwa toh u bood ya ka nongmuna yong oo, emkaam u em i mynsien dap chynrang.
Ya kani ka sngi da pynphooh da ki chaad wa ki rwai wa da pynkreh da ki dhab waphær waphær na ri-loom Jaiñtia.
Ha kani ka sngi da booh leh ya u syntu kam ka dak wow kynmoo warom ya uni u Khlawait da ka seiñ kamjooh leh ki seiñbhalang kam ka JSU, KSU-JHDU, AHPUF, HYC-JH wa kiwi kiwi.
Discussion about this post