Ka Shad Suk Mynsiem yong ka Seng Khasi Kmie ha Lympung Weking da man ko kawa chongkun ha kani ka kynti hadien wa chah pynthut noh ha ka khlam COVID-19 ha ki 2 snem wa dadep.
Kani ka lympung bah kawa le sngi da kut noh ko hei phooh i phieñ ynne ka sngi, wei ha kani ka sngi kut kiwa chaad waroh kiwa da wan wow chimbynta dapoi ki hadooh 1196 ngut kiwa da wan na kylleiñ ka ri Khasi-Jaiñtia, wei napyrdi kini, 618 ngut toh ki ‘Rangkynsai’ wa 578 ngut won toh ki ‘Thei Sotti’.
Ya ka Shad Suk Mynsiem da sdang nadooh u snem 1911, wei ha ka lai luti ha u snem 2020 toh ka sien wa nyngkong wa hap wow pynsangeh ya kani ka lympung neibhah i wan ban ka khlam COVID-19 heiwa ynnin u snem da pynman deiwa bood pynrkhiñ ya ki kyndon.
Hawa batai bniah chaphang ka Shad Suk Mynsiem wa kumno ki ‘Thei Sotti’ chaad ki hapyrdi katwa u chynrang won kær soodong ya ki, u Paia B Synrem, Assistant General Secretary ka Seng Khasi Kmie da ong u wa ini man ko wow pynkynmoo wa ki chynrang ki em ki ka yong ki ka bynta wow chare wow phira ya ka ‘Long Kur Long Jait’ wei leh ya ka man chnong man thaw.
Da ong u wa toh u kynmoo wa ki Khasi toh ki khon dap chynrang wei kamwa ksoh ki ya ka waitlam ha ka kti iwa iwon i leh thombor ya ka ri wa ka jaitbru ym chah da kammon kammon leh.
Chwa ya ini, utai u waheh da ong u wa ka kyntu kawa e ki neibynta ka jaitbru man ko kammon wow pynlai ya ka yung ka sem deiwa man hin hin kawa jai jai wow phooh ka jaitbru lyngba i bha i miat ki manyung mansem.
Da ong leh wa ka Shad Suk Mynsiem da nang phooh nang phieñ ko katni nei nang boon kiwa chaad katwa nang mih ki snem.
Ha kani ka lympung kawa heh yong ka Seng Khasi Kmie, da yoo leh yei tooid ki paidbah da ki hajar ngut kiwa da lai wow sakhi wei wow chimbynta iwa nang pynphooh pynphieñ chooh chooh ya kani ka lympung bah.
Ha kani ka sngi najrong kiwa yahkhmat wa hakhmat yong ka Seng Khasi Kmie, dawan poi leh ki kynrem ki lyndan, wa kynthup ya u Chief Justice ka Meghalaya High Court, u Sanjib Banerjee, u Symbood Montri Rangbah ka jylla, u Prestone Tynsong wa kiwi kiwi.
