May 13, 2016
0 Comments
Amlarem: Ka Lamin XI Sport & Cultural Club hapoh ka chnong Lamin da pynman ko yaka lehkmen kawa tip kam ka Rongkusi. Kani ka Chaad Rongkusi da pynman ynnin ka sngi wei da man ko kawa chongchit kawa phooh wa phieñ hei emlang u MLA u ma Stephanson Mukhim wa kiwi kiwi ki waheh na ki chnong wajan chirup waki paidbah.
Ha kani ka lehkmen da chimbynta da ki chynrang wa kynthai, hei klam lamphrang neiliang u waheh chnong u ma Golden Gashnga da ong u wa kani ka chaad Rongkusi da pynman yaka man u snem da ka Dorbar Chnong wa kiwi ki seiñ hapoh ka chnong kam chibynta wow wanrah i yatylli hapoh ka chnong ka thaw weiwow pynneh pynsah yaka Dustur wada booh na warim.
Man ko leh kawa kyrpang neibhah wa waroh ki paaid ka thaiñ War chimbynta ki khlem kheiñ ya kawon kawon ka niam neibhah kani man ko ka chaad wa yah na warim heipor wa jop thma.
Kam u kongsan u ma Stephanson Mukhim da yaroh u yaka Lamin XI Sport & Cultural Club waka chnong kamjooh wada ye ko u pynman ya kam kani ka lehkmen kawa tip kam ma Chaad Rongkusi neibhah man ko kam chi bynta wow pynneh pynsah yaka Dustur yong i. Wei da kyntu u wow pynneh ki yakani ka lehkmen yow wanrah i yatylli khnang wow ye u wanrah yei roi i paar hapoh ka chnong ka thaw.