Jowai: Ka KSU Mynksan Unit, West Jaintia Hills District lyngba u General Secretary u Garland S Manner, da pynsñiaw ki yei sñiaw chrai yei rukom chondur Smart Card yong ka chnat wa toh u pait ya kani ka kaam ha chnong Mynksan neidaw wa boon ki paidbah ym yoh laad ki wow chondur hanlada yang ki waroh chi sngi deiwa pep yei kreh hadien wa da dep pynbna chnong wa daw wan kiwa chondur Smart Card.
Ini da ktah ko ya kitu kiwa ym yoh laad wow chondur kiwa wan na jngai, kiwa mylla sngi, heiwa ki bru wa chondur da pyntip ki wa ym biang ka Network waka bordiñ kamtæ da jia kamni.
Neiliang ka seiñ da ong ko wa toh u wan chwa ki yow tip kammon man ka Network cha kani ka thaw wei toh u rah ki yaki Generator yow yoh bordiñ.
Kamwa man katni, tang chi pawa ki bru leh ym em yoh ki wow chondur ha kani ka shnong, da em kiwa hap wow lai chondur cha ki Block yow yoh ya kani ka Smart Card.
Kamtæ ka KSU Mynksan Unit da ban joor ko wa ka chnat i chait i khiah toh u phah biang ko ya ki bru cha ka chnong yow yoh u pyndep u chondur kitu kiwa ym yoh laad yow yoh yarap ki khamtam kiwa dooh wa duk manda em kjut i chitom neidaw wa ym em ki ya kani ka Smart Card.
Ini toh katkam wa pyntip lang u Samla Garland S Manner, General Secretary ka KSU Mynksan Unit wa u General Secretary ka KSU Jaiñtia Hills District.
Discussion about this post