U Montri wa pait ya ka puræ puthi ha ka jylla, u Lahkmen Rymbui da ong u wa ka sorkar ym em chong ngiah ko wow pynyoh ya ka tulop wa dang sah yong kiwa sikai Samagra Shiksha Abhyan (SSA) yong ka jylla, wei ka sorkar jylla daw leh ko iyi iyi chwa ka 31 tarik uni u Wisu wow pynyoh ya ka tulop kiwa sikai.
Ka Meghalaya SSA School Association (MSSASA) da pynbna ko wow pynjoor ya ki yakhih hadien wa ym yoh ki ya ka tulop kattu la kamwa 5 bnai, heiwa mynstep ka sngi ka 2 tarik daw pynman ki da ka yakhih hakhmat yong ka Secretariat.
Hawa kylli, u Rymbui da ong u wa i kaam hajrong ka SSA toh kawa eh bha, wei da pynsñiaw u leh yei wyrai ya kiwa sikai kiwa hap wow mih cha sarok du neibynta wow yoh yei hok yong ki. Da ong uwa neiliang yong ka sorkar da pyrchang ki katwa ye wow pynyoh ya ka tulop na ka sorkar pyrdi, da ong u wa ka Meghalaya da embhah ko neibhah wa ka toh ka jylla kawa da yoh lut ya i bynta wa nyngkong yong ka poisa wei katni ka sorkar dang yakhun ko wow pynyoh sa ya ka bhah ha ka bynta kawa ar namo ka ka 2nd Instalment.
Da pyntip u wa ha ka tayaw wa da dep da em u ha Delhi wow pynyoh ya ka bhah kawa ar. Da kyntu u ya kiwa sikai wow sñiawbha ki u yaichah, deiwa ong wa ka sorkar daw pyrchang ko wow leh iyi iyi deiwa pynrap wa hadien ka Dorbar Mangtangka ka jylla kawa daw pynman ha uni u bnai daw ye u leh iyi iyi.
