U Montri wa pait ya ki Kaam Pohyung hapoh ka jylla, u Lahkmen Rymbui da pyntip u wa ka sorkar jylla da dep phah ko cha ka Home Ministry ka sorkar India ya i pyrtuid ki bru wow man kam ki ksiang neibynta wow yaklam yasuk hapyrdi ka sorkar waka Hynniewtrep National Liberation Council (HNLC), wei da pyntip u leh wa hadooh katni ka Ministry ym pu em phah ko ya iwon iwon i jubab.
Da ong u leh wa u Montri Rangbah, u Conrad K Sangma daw lai u cha Delhi wow yaklam hajrong i kaam pynbait pood wa ka Ministry of Home Affairs, wei ye leh wow yaklam hajrong kani ka phang wow pynsmat yei yaklam yasuk.
Hawa kylli, u Rymbui da kyntait u wow khana yei pyrtuid wa ka sorkar da phah ko cha ka sorkar India, tangwa da ong u wa ka sorkar da phah ko da ki pyrtuid kiwa ye wow pdiang da ka sorkar pyrdi waka sorkar jylla. U Lahkmen da ong chooh chooh u wow pyndep chwa ya kawi ka kaam daw yaklam leh kammon wow leh ya kiwi ki bynta kam i sangeh yasiat wa kiwi kiwi de.
U Rymbui da ong u wa hadien wa yoh ya u/ka ksiang, ka HNLC daw yaklam bait ko wa kitæ kammon wow pynman ya ka yaklam yasuk.
Hawa kylli hajrong i chah dawa pisa yong kiwa khayi wa ki bru saiñpyrthai, u Rymbui da ong u wa hadooh katni ym pu yoh yutip ya ini wei lada em ini, ki pulit daw leh ki yeiwa emkaam, heiwa da ong u leh wa ka seiñ toh u sñiawthooh ko wa katwa dang lai i yaklam toh u sangeh lut waroh ki kaam pyrchah aiñ.
