Shillong: Ka yalang yong ka satri ki seiñbhalang wa em hapoh ka lama ka CoMSO, kawa da man ynne ka sngi da rai ko wow phyllu yumut wa ki bru chemphang kamjooh wow pynman ya ka yalang wa ki khlieh synchaar wow pachat yumut ki kammon ki laad wow yakhih khnang wow yoh ya ka Inner Line Permit (ILP) ha ka jylla.
Hawa yaklam wa kiwa pathai khubor ynne ka sngi hadien ka yalang, u Chairman ka CoMSO u Robertjune Kharjahrin da ong u wa ka CoMSO dap ko dei sñiawsih wei dooh mynsien na iyi wa mih na ka yalang ka dhab ka sorkar MDA wa u Amit Shah ynnin ka sngi ha nongbah Delhi.
Da ong u wa ka CoMSO yooluti ko wa u Amit Shah u e noh u ya ka ILP tangwa daw sylli (Examine) bniah donhi ka sorkar pyrdi yeini wei yoo lakam wa dang jngai u yoh yeini i angnood ki paidbah.
U Roberjune da ong u wa ha kani ka yalang da rai wow pynjoor yei yakhih wa heh wei ym man ko ka yakhih kawa du kamtu kamni donhi tangwa wow leh yeini emkaam ya ka yumut na ki bru waheh wa ki bru chemphang kammon wow wanrah ya ka yakhih kawa ye wow wanrah ya ka ILP.
Kawi won toh wa ka CoMSO daw khut ko ya ka yalang ki khlieh synchaar wow phyllu yumut kammon wow lai chakhmat wei ya ka yalang daw khut ha ki tayaw wow wan wa kynthup kawi ha ka Tura wa ha Shillong.
Da ong u wa kamwa man katni yoodur lakam wa dang jwat wow pynkohngooh ya ka sorkar pyrdi wow e ya ka ILP ha ka jylla.
Heijooh i por da ong u wa ka Direct Action kawa da pynbna ha ka tayaw wa dadep u neh ko wei kattu da phah ya ki dkhot wow kynreh syndet wei wow pait lada ki pulit kreh hok ki.
Da pynrap u leh wa ka CoMSO da pynkhreh ko wow lai kynreh syndet syndet ha man ki thaw wa kynreh ki pulit wei lada chem wa ki pulit ka Infiltration kheiñstiñ ki, ka seiñ daw leh ko yeiwa emkaam deiwa khor.
Discussion about this post