Ka Meghalaya da pyn-eh ko ha ka sngi wa ar ka yalehke yong ki ha ka Col CK Nayudu Trophy pyrchah ya ka Arunachal Pradesh ynne ka sngi deiwa yoh 5 Wicket da u Agreas Chamcham Sangma wa ki 50 Run na u Ibitlang Thabah wa u Abhishek Gupta.
Ka Arunachal da pteiñ ko ya ka sngi wa ar ha Cuttack na iwa ieh ko da 325/6 heiwa ynne da ye ko wow kamai sa 59 Run chwa wow haap luti ki Wicket deiwa kamai 384.
U Agreas da yoh sa ar Wicket ynne iwa man waroh 5/68 katwa u Abhishek Kumar (1/55) da yoh u ya u Wicket wa sah.
Kiwa Bat ka Meghalaya da haap smat uwi tangwa da wan wow yaleh pyrchah u Thabah (71) wa u Gupta (82 Not Out).
Kini ki arngut da kamai ki 154 Run niebynta u Wicket wa ar hadooh wa haap u Thabah da ka Run Out.
U Swastic Chettri (15 Not Out) da wan u wow pynyoh lok ya u Gupta hadooh wa kut ka yalehke yow pynyoh ya ka Meghalaya da 197/2, tangwa da em ko 187 Run chadien ka Arunachal.