Kiwa dang yoh COVID-19 ha India da em ki hapoh 60,000 ngut hadien 81 sngi wei da neh ki leh hapoh 1 lak ngut la 13 sngi. Kiwa chait leh da tam ki ya kiwa dang yoh la 38 sngi khlem sangeh.
Kiwa dang yoh COVID-19 ha kini ki 24 kynta da em ki 58,419 ngut, kiwa dang chait da em ki 87,619 ngut, kiwa dang yap da em ki 1,576 ngut iwa mut wa kiwa dang em ya uni u khñiang da hiar ki da 30,776 ngut.
Ha kini ki 24 kynta da em leh du 4 tylli ki jylla wa tam da kiwa dang yoh ya kiwa chait wa kynthup ya ka Arunachal Pradesh wa boon da kiwa dang yoh da 2 ngut, Dadra & Nagar Haveli and Daman & Diu 3 ngut, Manipur 292 ngut wa ha West Bengal 322 ngut.
Ynnin ka sngi da leh 18,11,446 tylli ki Test heiwa kiwa chah ktah da em ki 3.22% kawa tip leh kam ka Positivity Rate kawa da neh hapoh 5% la 13 sngi kattu wei kwa da hiar la 41 sngi heiwa ha u Naisan da em ko 15.16%.
Waroh kiwa da chait da em ki 96.27% kiwa em 2,87,66,009 ngut, kiwa dang chah ktah da em ki 2.44% kiwa em 7,29,243 ngut, kiwa yap 1.29% kiwa em 3,86,713 ngut, deilang dapoi 2,98,81,965 ngut kiwa da dep yoh ya uni u khñiang hapoh ka ri.
Heiyatoh wa i e dawai tika hapoh ka ri, da dep wow e la 27,66,93,572 sien heiwa ynnin ka sngi da e 38,10,554 sien.
