Uwa yahkhmat ka liang pyrchah, u Dr. Mukul Sangma da ong u wa ka sorkar jylla toh kawa smat bha wow kyntait wa ym em i tih mooyong pyrchah ya ka aiñ kamjooh i chalan tooh.
“Ka sorkar toh kawa smat wow len wei ini toh i rukom krehkaam ko,” da ong u Dr. Sangma hawa yaklam wa kiwa pathai khubor ynnin ka sngi heiyatoh wa iwa jia ha krem mooyong ha Umpleng, East Jaiñtia Hills District.
Katkam wa ong Mukul, ini i rukom kyntait toh iwa da pynkhreh bha wei da man ko kamwa leh drama heiwa da dep thoh chwa iyi wa toh u ong wei palat ya ini ym tip de ki wow ong da iwi.
Da ong u leh wa hawa waroh dang ya pynlut bor wow yaleh pyrchah ya ka khlam, ka sorkar jylla won da pynlut por ko chawi dei wym toh u pyn mahajon ya ka jylla tang yow pynmahajon ya ki kattu katni donhi.
Uwa yahkhmat ka Congress da ong u wa lada ym em ka takit wa laitlooid hajrong ki kaam pyrchah aiñ wa i chalan tooh hapoh ka jylla ym chem de yeiwa sakhiat.
Katkam wa ong u Dr. Mukul wa da em chwa ki sabut wa biang wei ym toh iwa eh ya kiwon kiwon kiwa pynman ya ka takit wow pynsakhait yei em i tih mooyong wa pyrchah aiñ kamjooh yei chalan tooh.
