Shillong: U MDC ka UDP ha KHADC na Shella uwa man leh uwa neiliang ka synchaar synrop ka Khasi Hills Democratic Alliance (KHDA), u Teinwell Dkhar da jop u ya i yajied kaam Chairman ha ka dorbar ka Council deiwa pynrem ya u kyrtong ka People’s Democratic Alliance (PDA) uwa man leh u MDC ka PDF na Mawkyrwat, u Hadrian Lyngdoh.
Ha i jied ya u Chairman ynne ka sngi neiliang ki MDC ka PDA kiwa em 12 ngut da poi ki 11 ngut katwa u Hadrian da yoh chiphaw Vote neibhah ka MDC na Nongshken, ka Grace Mary Kharpuri da mih noh ko na ka dorbar ha chwa ka thap Vote.
U CEM warim u Pynshngain N Syiem ym em poi u cha kani ka dorbar jied Chairman kawa da pynman ya u kyrtong ka KHDA wow tam da 7 Vote deiwa yoh 17 vote na ki 29 ngut ki MDC katwa u kyrtong ka PDA da yoh 10 Vote.
Hadien i jied ya u Chairman neiliang ki MDC na waroh arliang da kitbok ki ya u Teinwell wei da kyntu leh ya u Chairman wa thymme wow man u uwa lai ha ka luti wa pyrdi ha ka dorbar khlem da leh chilliang ya kiwon kiwon ki liang katkam ka aiñ ki kyndon ka District Council.
U Chairman wa thymme da pynsñiaw u yei sñiawngooh ya waroh ki MDC kiwa da yoobiang ya oo wow chim ya kani ka lyngkor kawa ha khlieh dooh ka Council. Heijooh i por u Teinwell da ong u wa ya waroh ki kaam ha KHADC u em ki ki aiñ ki kyndon ym du ya u Chairman u wow bood ya ki kamjooh leh ya waroh ki MDC toh u burom ki ya ka aiñ ka Council.
Discussion about this post