Ki pulit ka Meghalaya ynne da lai yah ki ya ki soo ngut kitæ ka Sonam Raghuvanshi, u Akash Rajput, u Vishal Singh Chauhan wa u Anand Kurmi cha ka thaw pynyieñ kari wa em hajan ka kchaaid Wei Sawdong yow pynyoo ki kammon da pynyap wei noh ki yei met u Raja.
Neiliang u SP ka East Khasi Hills, u Vivek Syiem da pyntikna u wa ka Sonam emlang ko heipor wa jia ini waroh wei ka kawa e dak namo ka Signal cha ki le ngut chwa wow poi cha kani ka thaw pynyieñ kari ha Wei Sawdong wow pyndep noh ki yei kaam.
Heipor wa chwa wow pynyap ya u Raja, ka Sonam lai ko nakhmat u Raja yow pait u cha ka yow lait u yoo ya kiwa nadien, u Vishal em u cha timun u Raja, u Akash neiliang tidiang nadien deilang wa u Anand.
Nyngkong da dat chwa u Vishal deiwa ksoh waroh ar tylli ki kti ya ka wait wei heini i por dang ye hi u Raja u yieñ wei da dat won sa u Akash tangwa ym ye u wow dat dei bor wa joor wei heini i por da chim u Anand ya ka wait yow pyndep yei kaam heiwa da mih i snaam wa boon.
Ka Sonam mar ya oo yeini da kiad wei da phet ko na kani ka thaw.
Hadien ini da rah ki le ngut ki chynrang yei met u Raja deiwa ksoh na kti wa na kjat wei da noh ki oo chapoh riat heiwa da pyntip ki nyngong wa sahkut i ha chiteiñ tangwa da haap won i rap cha tre.
U SP da pyntip u leh wa ha ini wa jia da pynemkaam ar tylli ki wait kiwa da noh ki chapoh synrang deilang kawi ka that u Vishal kawa da bi snaam chwa wow yut ki neini.
Discussion about this post