U MLA warim ka Ranikor Constituency, u Martin M Danggo hadien wa kiwa kyrchaan da dawa ki wow dam u yakhun na ka National People’s Party (NPP), ynne ka sngi da lai psiah noh u cha ka Bharatiya Janata Party (BJP) wei wow yakhun leh ya ka Election na kani ka Party.
Chwa ini ha ka 30 tarik wa da dep, kiwa kyrchaan yong oo da yalang ki ha Shillong heiwa da chim ki ya ka rai wow phah yakhun noh ya oo na ka BJP, wei ha kani ka sngi da ki spah ngut kiwa kyrchaan ka NPP ha Ranikor da psiah ki cha ka BJP, ynne ka sngi won neiliang uni u MLA wa u Speaker warim ka jylla da lai psiah pura noh u cha ka BJP.
Kam wow kdaw heini ka NPP da pynbna ko ya u Danggo kam u kyrtong na Ranikor hadien wa da psiah u cha ka NPP ha u Thohlakhmi (Feb) u snem wa da dep, wei dang ha ka 12 tarik uni u bnai wa dep leh i pyrtuid u Danggo da em i ha ka thup yong ki 58 ngut ki kyrtong ka NPP ya kiwa da pynbna ha ka yalang paidbah ha Shillong, tangwa du hadien 2 tayaw ka saiñhima da kylla ko ha Ranikor neibhah ki paidbah ym kwah ki wow yakhun u na ka NPP.
Neiliang u Danggo da ong u wa ka rai wow psiah cha ka BJP ymtoh i rai samen yong oo, wei ha ka yalang wa da man ha ka 30 tarik, ki paidbah wa kiwa kitkaam da rai ki wow dam noh u wow yakhun na ka NPP wei da psiah u cha ka BJP ynne ka sngi.
