Ynne ka sngi, u Waheh Chnong yong ka chnong Khliehsniriang, u Francis Lyngdoh wa u Secretary Chnong, u Iarap Lamare ryngkat wa ki EC ka dorbar chnong ha ka sien kawa ar da lai yachem biang ki wa u Assistant Executive Engineer ka Khliehtyrshi Sub-Division ka MeECL yow dawa kyrriah wei chna pynchkeh ya ki chrot bordiñ wa pynlai ya ki sainar ka 33 KV Line kiwa em hapoh ka chnong.
Neiliang ka chnong da ong ko wa kini ki chrot ym em skem i rukom yieñ ki wei da man ki leh kiwa da rim kiwa da booh hei maa ya kiwa em marjan wei da ood da naam bha ki bru cha kiwa kitkaam chnong.
Chooh chooh da ong wa i rukom yieñ kini ki chrot bordiñ da khanglaad yei lai i wan na ka luti wa jooh lai ki bru wei lada ym chimkhia ki bor wa toh u pait yeini ym dam de ki u pat u oor wei daw chah ktah leh kiwa chong chnong kiwa ye u mynsoo deilang ki chnong kiwa em marjan.
Kamtæ kiwa yahkhmat chnong da dawa joor ki deiwa eh wow kyrriah noh ya kini ki chrot bordiñ cha ki thaw wa biang wei wow pynskem ki khnang yow lait na iwon iwon i jia wa sñiawsih hadien habood.
Discussion about this post