Jowai: U District Magistrate, West Jaiñtia Hills District, Jowai da pynmih hukum (Prohibitory Order) u haka 23 tarik uni u bnai (September), 2020 hapoh ka Section 144 CrPC ha waroh kawi ka District wa kynthup yaka Amlarem (Civil) Sub-Division, Thadlaskein Block wa Laskein Block yow khang yei poor ka khlam COVID-19.
Ka hukum toh kawa krehkaam nadooh ka 23 tarik u September, 2020 hadooh wa pynmih hukum da kamwi kawa neh nadooh 5 waje i step hadooh 9 waje i miet man-ka-sngi. Da khang leh wow pynman ya ki Border Haats wa ki yaw wa em khappood wa kiwi ki jylla.
Ka hukum da ong ko wa lada em kiwon kiwon ki yalang hap wow bood yaka Social Distancing deiwa yajngai 6 phut uwi ya uwi, u deiñ yaki Face Mask kamjooh leh wow bood yaki kyndon wa da e daka sorkar.
Da khang wow pynman ya kawon kawon ka yalang niam, yalang paidbah, u wai yaki thaw mane Blai cha ki paidbah, katwa ya ki lehniam pynkyntang bia ha ki thaw mane Blai u chah du hadien wa yoh bor na u District Magistrate.
Ym pu chah wow wai yaki Cinema Hall, Swimming Pool, Entertainment Park, Theatre, Bars, lane kiwon kiwon ki thaw wow pynman yaki yalang paidbah, lane ki thaw pynmuja .
Da khang leh wow mih ki bru kiwa em 65 snem chaneiñ, kiwa chitom, kiwa punkhon waki khynnah wa 10 snem chapoh. Ym chah wow dih kiad, u baam kwai, duma ha ki thaw paidbah kamjooh wow mynthu haki thaw paidbah. Wei ha ki thaw kreh hap wow deiñ yaki Mask.
Ya ki bru wa wan na baar jylla ki wakreh ym pu chah lait noh ya kitu ki Highly Skilled, Specialized Professional wa Technician wa pynbiat daka Political Department.
Lada em wa yap bru, ym toh wow em palat 20 ngut ki bru. Ha ki lehniam bia u chah du 50 ngut ki bru lane chi bhah naka le bhah wa hoi u chong ki bru. Ki khawai bia ym chah wow pynman.
Ki dukan Supply Chain/Wholesale Retailer, Outlet wa kiwi kiwi kiwa da chah u wai, u wai ki Monday hadooh Saturday 9:00 AM hadooh 7:00 PM katwa ki yaw wa pynman chisien chi tayaw u wai ki ki sngi pood kamwa da pynbait da ki Odd/Even Number.
Ki kaam wa yatoh waka rep ka riang, ki karkhana hap ki wow bood yaki kyndon sorkar.
Da chah leh wow wai ki thaw leh Yoga waki Gymnasium deiwa yoh bor na u Deputy Commissioner deiwa bood yaki kyndon (SOP) wa da pynmih daka Ministry of Health & Family Welfare.
Da chah leh wow wai ki Cyber Café deiwa yoh bor na u Deputy Commissioner deiwa bood yaki kyndon wa booh daka chnat Information Technology & Communication Department ka sorkar Meghalaya.
Da chah leh wow wai ki thaw e sikai yaleh bol namo ki Football Training ki yong ki Sports Club wa ki Association deiwa bood yaki kyndon ka Sports & Youth Affairs Department deiwa yoh bor chwa na u Deputy Commissioner.
Ki dukan dai baam kiwa em ha ki sarok-bah (National Highway) da chah wow wai ki deiwa bood yaki kyndon kiwa da booh ka sorkar wei kini ym toh u em ki hapoh ki Containment Zone.
Da pyndam ya i pynlai kari deiwa bood yaka Odd/Even Number ha waroh kawi ka District.
Tangwa i rukum chong ki bru hapoh kari kamai kamjooh ki kari ki bru samen man ki kamni: Ha ki Bus u chah 50%, ki kari SUV wa kynthup yaki Sumo wa Maxi Cab u chah 4 ngut deiwa khlem kheiñlang wa uwa yah kari, haki kari khian (LMV) u chah 2 ngut khlem kheiñlang wa uwa yah kari, ha ki Auto rickshaw u chah uwi khlem kehiñlang wa uwa yah, ha ki ar chaka won uwi wa chong hadien wa toh u man ka kynthai lane i khynnah wa hapoh 12 snem kiwa naka jooh ka manyung.
Ya i wanrah bru wakreh na baar jylla u chah du yaka Highly Skilled, Specialized Professional waki Technicians wei toh u leh katkam ki kyndon wa da booh daka Political Department ka sorkar Meghalaya, ki kyndon ka Labour Department kamjooh ka Health & Family Welfare.
I wai yaki Industrial Training Institutes (ITI) da chah nadooh ka 24 tarik uni u bnai deiwa bood yaki kyndon wa pynmih da ka Directorate General of Training, Ministry of Skill Development & Entrepreneurship, Government of India kamjooh ki yong ka Health & Family Welfare Department.
