Khliehriat: U Deputy Commissioner (Excise), East Jaintia Hills District da pynbna paidbah u heiyatoh wa i rukom pynbait wow wai yaki Bar, ki Hotel, Clubs, Restaurant kiwa yoh bor wow dai kiad deiwa chong dih kiwa haap hapoh ki jait License waphær waphær kiwa da chah wow krehkaam biang nadooh ka 31 tarik uni u bnai hapoh ka District deiwa bood yaki kyndon (SOP) wa da pynkhreh daka sorkar.
Kini ki IMFL License Bar, Hotels, Clubs, Restaurant u chah u wai ki nadooh 1 waje i sngi hadooh 8 waje i miet. Ym chah wow booh wei wow pynman ya i chaad, ki tem ki put, ym chah leh wow wai ki Bar wa em hapoh ki Containment Zones, ym chah leh wow pynman yaka yalang wa boon bru. Ki bru wa em 65 snem chaneiñ ym chah wow psiah ki chapoh kini ki thaw kamjooh ki kynthai wa punkhon.
Hap wow bood yaka Social Distancing, u deiñ yaki Mask, wei u booh wakreh du kat wow biang yow ye u pyntikna wa bood yaki kyndon wa da booh ka sorkar wei lada ye toh u booh jar jiar ki thaw psiah thaw mih ya ki wakreh wa ki bru wa wan cha kini ki thaw deiwa booh leh ya ki thaw sait kti, ki Sanitizer wa ki kor thaw chait namo ka Thermal Screening.
Ki paidbah ym toh u em ki palat ya 50% ya ki thaw wa hoi u chong wei lada ye toh u booh thaw chwa u wan yaki, ki Menu toh u pynemkaam da ki Disposable Menu kiwa hoi u noh hadien wa pynemkaam, heithaw ki that niam kti, toh u pynemkaam da ki kot kiwa hoi u noh hadien wa pynemkaam wei heiyatoh wa i su; toh u pynemkaam da ka Digital Mode of Payment.
