Ynnin i janmiet ki bor District da pynmih ki ya ka hukum wow pynman Containment Area ya ki san tylli ki Dorbar Chnong ka Jowai wa kynyhup ya ka Dongmihsngi, Ladthadaboh, Moosalyngkat, Lumpariat wa ka Caroline Colony neidaw u COVID-19 iwa da wanrah yei kulmar hapyrdi kiwa chong chnong kini ki chnong.
Ynne ka sngi ki bor pynlai ki san chnong da lai yachem ki ya u DC ka West Jaiñtia Hills, u Garod LNS Dykes heiyatoh wa i pynmih ya kani ka hukum Containment wei wow pyndam noh ya ka.
Hadien ini i yachem hawa yaklam wa u DC ka District heiyatoh wa i rukom pynmih ya kani ka hukum, da ong u wa hadien wa yoo wa em boon ngut kiwa da chah ktah ha u COVID-19, ha ka 24 tarik ka Medical Officer ka Ladthadlaboh UPHC da yachem ko ya ki Village Covid Management Committee we ha ka 28 tarik i janmiet da yoh u yei tyrwa (Recommendation) na ka chnat i chait i khiah wa emkaam wow pynman Containment ya kini ki san thaw katwa kamtæ da pynmih ya ka hukum ynnin ka wow krehkaam nadooh chiteiñ synyaaw (Midnight).
Da pynrap u leh wa katkam wa toh u man, ya ka Containment toh u pynkrehkaam wut wut (Immediately) neibhah ym myntoi u pynman Containment ya ka thaw hadien kattu katni sngi lada ong u yakhun pyrchah yei poor i kjut.
Heiyatoh wa i yachem wa ki Waheh Chnong kini ki san chnong ynne da kyntu ki wow pyndam noh ya ka Containment nadooh 5:00 waje i step ka 1 Khonchonglad (November) wei hajrong ini da pyntip u wa daw yang ya i tyrwa (Recommendation) na ka chnat i chait i khiah wei katkam wa man kattæ dang yang ya ka Report yong ki kattu katni ngut.
Da ong u leh wa ka Containment Area kamwa da leh ha kiwi ki thaw heiwa da khang ya ki yung (Building) namo da ka Micro Containment Zone man ki kiwa eh wow leh hapoh ka District neibhah wa ki yung man ki kiwa yajan iwi na iwi wei emkaam bait wow leh da ka Containment Area bait neibhah kani man ko kawa myntoi dooh wow khang yei poor uni u khñiang.
Da kyntu u leh ya ki Dorbar Chnong wow pynchlur ya ki paidbah wow bood ya ki kyndon wa da booh da ka sorkar wow yaleh pyrchah ya uni u khñiang.
U Garod da pynche u wa katkam ki kyndon ya ki thaw wow pynman Containment toh u em 3-15 ngut kiwa chah ktah ha u COVID-19 wei katkam i por wow neh ka Containment toh 14 sngi tangwa itæ leh chong i ha ka rai wa i tyrwa ka chnat i chait i khiah.
Heiyatoh wa i emkaam mar baam ki bru kiwa ymyoh u lai thied chwa, u Garod da pyntip u wa ini daw pynbiang ka sorkar tangwa emkaam wow su dei dor ya ki mar wa emkaam ki.