U DC ka West Garo Hills District ynne da pynbna u wa kawi na kiwa yoh nyngkong ya u COVID-19 hapoh ka District man ko kawa da chait wei da yoh noh ko wo mih napoh Hospital.
Da pyntip u leh wa ka wa ar won wa yoh COVID-19 hapoh ka District daw leh ko yaka RT-PCR haka 10 tarik wei waroh kiwa yoh COVID-19 hapoh ka District da em ki 5 ngut.
U DC da pynyoo lang u lyngba ka Facebook yei yoh kani kawa da chait u mih Hospital na Tura Civil Hospital heiwa da emlang kiwa sumaar yaka nadooh ki Doctor waki Nurse kiwa da sumaar yaka 16 sngi, heiwa da pyntikna wa ym em de ko ya uni u khñiang kamjooh ki dak ki chin wa chitom ko hadien wa da dep Test biang yaka la arsien.
U DC da ong u leh wa hanla yaka Lockdown ym em de pynrkhiñ yaka wei da sdang boon leh kiwa da chait, ym em mut wa toh u lai u mih kat cha wa kwah khamtam cha ki thaw wa boon bru wei wym toh u mylliñ wow deiñ yaki Mask kamjooh wow sait yaki kti wei wow bood leh ya waroh ki kyndon wa booh daka sorkar.
Da e khublei wei da yaroh u leh ya waroh ki wakreh hei chait hei khiah kamjooh kiwi kiwa em hakhmat dooh wow yaleh pyrchah yaka khlam COVID-19. Deiwa ong wa ini i chait kani kawi toh iwa da e mynsien ya kini waroh.
