Ar sngi hadien wa ki paidbah da chem ki yei khlieh bru wa pær ha rood ka nan Umiam, ynnin ka sngi da chem sa yei doh i pran na iwi i thlu wa da tlep harood hi ka Umiam wa ya ka kti tidiang kawa da tkut nadooh na tympha da chem na rood kani ka nan wei da wan chimkti ki pulit ynne ka sngi hadien wa da kær kut ya ini i thaw.
Uni u bru uwa da chah tynyap beiñ ha ki damok wa thrang snaam, da wan wow noh yei metyap u ha kani ka thaw wei da tip ya oo kam u Omeka Myrthong uwa na ka chnong Mawlaingut, East Khasi Hills wei man u leh uwa da em 5 ngut ki khon wa iwi iwa dang chi bnai.
I rukom chah tynyap u man i iwa yoo chyrkhei hadooh kattæ kattæ heiwa ki damok da khrai khlieh ki deiwa ah na rdang najrong i pyntkut leh ya ka kti wei da noh ya ki ha Umiam.
Hadien wa da chem yei metyap wa ka kti, ki pulit ka Ri-Bhoi wa ki Crime Unit na Shillong , ryngkat kiwa ha-yung ha-sem wa ki bru na ka chnong da lai ki wow chimkti noh yeiwa dang sah wei wow leh yeiwa emkaam katkam ki kyndon aiñ.
Katkam i khana u Saindor Nongbsap, Secretary Chnong Mawlaingut, da ong u wa katkam wa pyntip da kiwa ha-yung ha-sem yong uwa chah tynyap, da wiar u na chnong nadooh ka 26 tarik u bnai wa dep wei da thooh ki oo dei yong chnong tangwa ym chem ya oo, kamtæ ha ka 3 tarik uni u bnai da lai pyntip ki cha ki pulit ka Lumdiengjri Police Station.
Da khana u leh wa uni uwa chah tynyap toh u bru uwa bha wei u wym em iwon iwon i dak sih ha chnong ha thaw, neibhah wa man u u bru wa smat wow ya krehlang wa ki bor chnong bor thaw.
Na kini ki daw, neiliang ka chnong da beiñ joor ko ya kini ki damok kiwa emkti wow tynyap dusmon ya utai u waheh wei da dawa ki leh na ka chnat pulit wa toh u chimkhia ki wow thooh wow kdong ya ki damok wei wow pynchitom deiwa eh khnang wa kiwa kam ini i jia ym jia de i neini chakhmat.
Hadien wa da dep ya ka takit neiliang ki pulit da rah noh ki yei metyap cha Civil Hospital Nongpoh yow leh yaka Post Mortem.
