U Lahkhmen Rymbui deilang wa u Wailadmiki Shylla kam ki Montri sorkar chirup wa ka MLA ka Sutnga-Saipung, ka Santa Mary Shylla ynne da lai hiar ki cha Mynsngat, Thangskoo yow yoo dei khmat yeiwa jia ha ka paar tih mooyong wa em boon ngut kiwa da yap deilang kiwa mynsoo.
Neiliang u Lahkmen da pyntip u wa mar ya tip ki bor District wa kynthup ya u BDO deilang ki Doctor da wan ki cha kani ka thaw wei ki bru ka NDRF manda poi ki ha ini i thaw da chem ki wa em 18 tylli ki metyap wa phra ngut kiwa mynsoo.
Ya ki metyap da kit cha Khliehriat yow leh ya iwa emkaam wei na kiwa mynsoo, da em 7 ngut kiwa da kit cha Shillong katwa uwi da em u ha Jowai.
Da pyntip u leh wa ynne heipor 1:30 i sngi da ye wow sai sa iwi i metyap iwa mut wa kiwa yap da ku cha 19 ngut wei neiliang ki pulit da kem ki leh ya ar ngut ki bru kiwa suba wa pynlai ya kani ka thaw tih mooyong.
Yei pyrtuid kiwa yap da ong u wa ym pu em ye u pyntikna.
Da ong u leh wa ki bor District da khang noh ki ya kini ki thaw tih mooyong yow lait u jia biang kamni.
Chooh chooh da ong u wa kamwa da yoo wa kani ka thaw em ko cha kdong bha wei chitom u poi wei da chem wa em boon bha ki thaw wa tih mooyong pyrchah aiñ.
U heh ka NDRF da ong u wa nyngkong da thooh hapoh kawi ka krem mooyong tangwa ym em chem wei manda thooh ha kawi won ka krem da chem yei metyap ynne.
Discussion about this post